الحب الأول - عايز اعرف آرائكو

**ahmed_ae** · #1 (**permalink**) 18-01-2008, 07:26 PM

يا جماعة فى موضوع عايز اعرف رأيكم فيه. . . . .

موضوع الحب الأول كل انســـان مننا عنده مشاعر و لازم يكون عدى بمرحلة الحب الأول بس انا معرفش ليه دايما أو غالبا إلا ما رحم ربي بيكون فاشل بمعنى انه مش بينتهى بنهاية سعيدة و هى الزواج طبعا لكن بينتهى نهائة مؤلمة لأحد الطرفين و دا ناتج طبعا عن تخلى الطرف الآخر عنه أو نهاية مؤلمة للطرفين فى حالة انتهاء الموضوع بشكل خارج عن إرادة الطرفين و دا اعتقد انه صعب انه يحصل مهما كانت الاسباب و الظروف الاجتماعية و الاقتصادية فغالباً بيكون النهاية مؤلمة لأحد الطرفين " انا اعتقد ان الموضوع دا بيحصل نتيجة سوء الأختيار " و بيترك عند الطرف الآخر نتيجة سلبية فى مشاعره و خصوصاً لما بيكون الموضوع كان لفترة زمنية طويلة بمعنى استمرت علاقة الحب أكتر من سنة. فهل الانسان بينسى الحب الأول بكل ما فيه من زكريات ولا بتفضل عايشة بداخله و هل يقدر إنه يكمل مع شريك جديد بدون أي سلبيـات فى شخصيته أو مشاعره ناتجة عن الحب الأول ؟
اتمنى اعرف آراء الأعضاء !!

**MaestrO** · 18-01-2008, 07:37 PM

بصراحه يا احمد انا مش بعترف بالحب الاول
الحب الاول بيتنسي لو الانسان لقي شريك حياته الصح
اللي يكمل معاه باقي حياته
انما الحب الاول ده بيكون عباره عن تجربه الانسان اول مره بيمر بيها فعلشان كده بيتعلق بيها فتره
انما مش بيكون الاساس

تسلم يا احمد علي موضوعك

و عاوزين نعرف برده ايه رايك انت كمان

**ahmed_ae** · 19-01-2008, 07:50 AM

و الله يا محمد فى رأي ان الموضوع دا يختلف بين إنسان و آخر بمعنى إن قلب الانسان فى تشبيه مثل قطعة الاسفنج فمن الممكن ان تكون متشبعة تماما بالماء و ممكن ان يكون فيها كمية قليلة لكن الحالتين بيكون الاسفنج محتوى على ماء.

أرجو ان تكون فهمت وجهة نظرى بالنسبة لتقبل الانسان للحب. أما بالنسبة لمرحلة النسيان فالله أعلم.

**Shoshou** · 19-01-2008, 10:06 AM

موضوع جميل يا احمد..
انا عن نفسى هحاول اقول رأيي بإختصار على اد ما اقدر.. لان الكلام ف الموضوع ده كتير اوى
بالنسبه للحب الاول ف اعتقد انه هو الحب اللى بيتحس فيه كل حاجه لاول مره..
يعنى اول مره تقول وحشتيني.. بحبك.. إلخ

واى حاجه ف اول مره بتكون دايما ليها طعم تانى..
وبتكون من غير حسابات.. يعنى الكلمه بتتقال عشان هو ده اللى جواك فعلا..
لكن لما يحصل والطرفين يسيبوا بعض مثلا.. بيبقى بعد كده فيه حسابات تانيه.. وفيه اعتبارات للجرح القديم.. ومش بتكون كل حاجه على طبيعتها ولا حاجه.. بيكون الواحد إتأثر باللى حصله ف التجربه القديمه..

اكيد الواحد بيكتسب خبره م اللى قبل كده.. وبيحاول انه ميقعش ف نفس الاخطاء اللى وقع فيها اول مره.. مش بيكون على سجيته زى اول مره..

**وعلى فكره انا شايفه ان الحب الاول مش شرط يكون هو اول ارتباط يعنى.. لأ خالص
يعنى مثلا مثلا واحد اعجب ببنت.. وارتبط بيها واستمروا فتره مع بعض.. وسابها.. وارتبط بواحده تانيه حس معاها بكل حاجه وحس فعلا انه بيحبها.. يبقى هى دى الحب الاول ف حياته.. اهم حاجه الاحساس بـ "الحــب" لأول مره.. مش الارتباط كفكره وخلاص.. المهم الاحساس نفسه..

وسورى لو كنت طولت عليك يا احمد بس فعلا الموضوع جميل..

ارق تحياتى..

**ahmed_ae** · 19-01-2008, 08:43 PM

شكرا يا شوشو على التعليق الجميل و مرورك العطر.

هوا معاكي حق فى كلامك بس تفتكري ان لو في حب استمر فترة طويلة بين طرفين و بعد كدا محصلش نصيب و كان من احد الطرفين و طبعا الطرف الآخر بيسيب عنده آثار سلبية ممكن ينسى الموضوع بسهولة و يبدأ مع انسان جديد