الرجاله دول هيجننوني

**SweeT AngeL** · #1 (**permalink**) 16-11-2007, 02:28 PM

يا ناس حد يقولي

ليه لما واحد يتقدم لواحده اهم حاجه عنده انه يبوسها ويحضنها؟؟؟؟؟؟؟؟؟؟

ليه ميتعملش معاها بمنتهي الادب والاحترام؟؟ (انا مقصدش كل الرجاله انا اقصد نوعيه بعينها)

انا الموضوع ده استفزنى اوى خلاص لانى سمعته اكتر من مره من صحابى واكيد حصل ليا زمان وراحت صحبتى حكيتلى

من اسبوع اتقدم لواحده صحبتى واحد اكبر منها ب13 سنه حست انه انسان كويس فقالت تتغاضي عن السن بما انهم متفاهمين ولازم تخد حد فيه عيب فوافقت.....

ومع اول زياره ليه حاول يبوسها (للعلم ده مكنش اختبار ليها لا ده كان بجد عاوز يعمل كده) هيا قالت ده راجل ومش هيعمل حركات العيال دي لكن هيهااااااات.

واللى يغيظ انها لو رفضت يقولها انت مبتحبنش والاسطوانه دى ويمد بوزو شبرين ويعمل فيها البرئ اللى مغلوب على امره

السؤال ..

ليه مش كل الرجاله يعملوا اي بنت هيخطبوها بفكر متفتح ومش مجرد جسم هيتعامل معاه؟

انا عرفه ان في ناس بتفكر ان جسمها مهم بس ليه ميتعملش مع روحها وشخصها وبعدين جسمها كده كده هيتعامل معاه بعد الجواز

لو حد عنده رد منطقي ياريت يقولي لاني بجد متضايقه من نظره الراجل للبنت

وباريت نكون واقعيين

معليش دى ممكن تكون جراءه منى زياده

بس بجد موضوع مهم

ارق تحياتى

**Rashad** · 16-11-2007, 03:44 PM

هوا والله مش كل الناس بتعمل كده فى ناس وناس وبعدين اليى بيبئا عايز يبوس من اول مرة دا حيوان مينفعش على الاقل 3مرة
وشكرا
rashad

**SweeT AngeL** · 16-11-2007, 07:37 PM

انا مقلتش كل الناس يا رشاد بس الاغلبيه

بس اللى بيعمل كده يمكن يكون فاكر انه خطب مثلا يبقى خلاص يعمل اللى عايزه

وطبعا لما يعمل كده ده بفكره هيقول وانا اتجوز ليه مهو انا ممكن اقدر اعمل تقريبا كل حاجه

وفى منهم بيفكروا انى لما اعمل كده هنقرب من بعض اكتر وان ده الحب كده

بس بالعكس ده بيعمل فجوه كبيره بيكبر المسافه مش بيقرب

مش عارفه

ياريت نشوف باقى اراء الاعضاء

وشكرا ليك يا رشاد على مرورك

ارق تحياتى

**LiMoO** · 16-11-2007, 07:49 PM

والله يا رانيا في ناس كتير بتمشي بالأسلوب ده

الواحد حقيقي بيأسف لما بيشوف ولد بيكلم بنت على اساس بس انه عايز كده منها... حد يقولي بقا ايه الفرق بينها وبين أي "ساقطة" - ده لو هو بيفكر في الاسلوب ده كده بس معاها.

بعض الناس يا روني بتفكر انها ممكن تشتري اي حاجة بفلوسها بمعنى كلمة أي حاجة ، مش بس على موضوع انه يخطبها او يتجوزها علشان كده ، ده في ناس بتخطب او تتجوز كحب امتلاك ، زيها زي أي جماد وآسف على التشبيه. بس انا كمان شوفت حالات قدام عيني كده ، بيكون ارتبط او خطب او اتجوز علشان يعاملها لمجرد انه يتنفذ له كل طلباته ويكون الرد الحتمي كلمة "حاضر".

لا الناس دي فاهمة المرأة غلط ، وبتقلل من شأنها ، وبيهمشوا دورها ... يعني ناس مش بتفهم بالعكس هما اللي كلمة بني آدمين دي كتير عليهم اصلاً ومش يستحقوها.

تسلمي روني ومتابع موضوعاتك دايماً.

أرق تحية

**Shoshou** · 17-11-2007, 04:01 PM

فيه ناس كده وللاسف انا كمان سمعت عن حالات كده.. بس مش لدرجه من اول مره يعنى

يعنى بعد فتره بيحصل انه بيلمح على كده.. او بيحاول فعلا
ليه بقى ؟

بجد مش قادره الاقى تفسير لكده
هل معنى انك خطبت واحده انها كده بقت مراتك يعنى تعمل اللى ف نفسك ؟

المفروض ان الراجل يحط ف حساباته ان البنت دى لسه مش على زمته.. يعنى مينفعش يتطاول عليها بأى شكل م الاشكال..
هحكيلك على موقف حصل لواحده صحبتى..
بإختصار شديد صحبتى دى اتخطبت.. وبعد فتره خطيبها ابتدى يحاول يعمل حاجات بتدايقها كده..
عارفه كانت ايه النتيجه ؟
خلاص هيسيبوا بعض.. العلاقه باظت خالص.. ولما قالتله انت ليه بتعمل كده ؟ قالها تفتكرى انا فكرت اتجوز اساسا ليه يعنى ؟

احساس وحش اوى لما البنت تحس انها مجرد حاجه الراجل بيفرغ فيها شحنه عنده وخلاص.. عمر ما ده كان دور البنت ابدا.. ولا كان هى دى لزمتها..
مجرد ان الراجل يفكر كده ف البنت.. دى بتكسر حاجه جوه البنت.. الله اعلم بتتصلح ولا لأ
ميرسي بجد لموضوعك يا رونى.. وسورى لو طولت..

ارق تحياتى..