¤¤¦‡¦لو سمحت.. هو انت ضفدعه ؟ ¦‡¦¤¤

**Shoshou** · #1 (**permalink**) 23-08-2007, 04:22 PM

السلام عليكم ورحمه الله وبركاته..
ازيكوا كلكوا ؟
يارب تكونوا تمام..
بصوا الموضوع اللى عايزه اتكلم فيه النهارده كالآتى..

كان فيه مجموعه علماء عملوا تجربه على ضفدعه.. حطوها ف مكان فيه ميه بتغلى.. واول ما حطوها قعدت تنط بسرعه لحد ما قدرت تطلع م الجحيم اللى حطوها فيه ده..
لكن لما نفس المجموعه من العلماء دول حطوا الضفدعه ف مكان الميه اللى فيه حرارته عاديه.. وابتدوا يرفعوا الحراره شويه شويه وسخنوها لحد ما وصلت لدرجه الغليان كان رد فعل الضفدعه انها فضلت ف الميه وماتت من غير ادنى محاوله للخروج من الميه المغليه دى..
العلماء فسروا ده بإن الجهاز العصبى للضفدعه مش بتستجيب غير للتغيرات الحاده.. إما التغير البطئ على المدى الطويل ف الضفدعه مش بتستجيب ليه
طبعا الموضوع لحد دلوقتى ممل جداً..

احنا يعنى قاعدين ف حصه أحياء ؟

لا بس اللى عايزه اوصله ان هو ده حال الدنيا معانا..

التغيرات المحيطه بينا بتكون بطيئه لدرجه ممله.. ولكنها تغيرات مهمه حاسمه ف معظمها..
تعالى كده..
قارن بين حياتك من سنتين وحالك دلوقتى.. هل فيه تغيرات حواليك ؟

بيتهيألى هتتفاجئ من حجم التغيرات اللى حصلت حواليك.. لكن ازاى كانت استجابه جهازك العصبى ليها ؟

حسيت ان صغائر الامور ف حقيقتها حاجات كبيره اوى ؟
وأن معظم النار من مستصغر الشرر ؟
هل كنت زى الضفدعه اللى الدنيا اتحركت من حواليها وهى محستش بأى حاجه عشان كده ماتت ؟

ولا استوعبت التغيرات اللى حصلت حواليك وحاولت بكل جهدك تتعايش مع التغيرات اللى بتحصل دى وفكرت ف تطوير حياتك ؟
هل حالك مع نفسك ومع ربنا زى حال الضفدعه ومقدرتش تحس بالصدأ اللى هبط على فليك وكل يوم بيبعدك عن ربنا خطوه بخطوه لحد ما وصلت لسجن صعب تطلع منه ؟

حالك مع اهلك عامل ايه ؟ هل فوجئت انك اصبحت شخص بعيد عن اهلك وقاطع لصله الرحم ومفهمتش ان اهمالك لصله رحمك وصلك ف الاخر لشخص غريب عنهم ؟ :sad:
حالك مع نفسك برضو عامل ايه ؟
هل سعيت لتطوير نفسك وتعليمها الجديد من العلوم ولا اتفاجئت ان الناس اصبحوا بيبصوا ليك على انك جاهل ومتأخر ومش عارف حاجه ف الدنيا اللى حواليك ؟

حالك مع اخواتك ؟ هل اتفاجئت انك اصبحت بعيد عنهم وان مسافات شاسعه ظهرت بينك وبينهم بسبب حاجات انت استصغرتها ؟
في كل شئون حياتك اقف مع نفسك و إسأل هل أنت ضفدعة ......؟؟؟

ومستنياكوا تقولولى وصلتوا لإيه..

ارق تحياتى..

**MaestrO** · 23-08-2007, 04:23 PM

محجوز .. ليا عوده مره اخري

**Shoshou** · 23-08-2007, 04:41 PM

طيب عايز صاله ولا بلكون ؟

مستنياك يا محمد وعايزه اعرف رأيك اكيد

ارق تحياتى..

**LiMoO** · 24-08-2007, 04:48 PM

جميل اوي اوي اوي يا شوشو الموضوع ده بصراحة عجبني جداااااااااً

وبيتكلم في نقطة حساسة اوي ممكن احنا مش نكون آخدين بالنا منها لحد ما الواحد قرب يوصل على "شفا حفرة" زي ما بيقولوا

بس بيرجع يقعد مع نفسه ويفكر ويبدأ يوزن في الامور ويديلها حجمها الصح ، يعني اذا كان في اخطاء بالجملة ... فالواحد بيحاول يعالجها واحدة واحدة زي ما هوا اتحط فيها بنفس الطريقة.

على العموم برضو المسألة بترجع للشخصية ، ومدى انقياد الشخص للافراد اللي حواليه ، والظروف اللي هوا بيمر بيها.

كل ده طبعاً مع وجود العلاقة بينه وبين ربه واللي هيا اكيد بتسهل عليه حجات متحصاش.

مبدأ الموضوع جميل ، ياريت اسمع آرائكم ايه ، والموضوع اكيد مفتوح لاي عضو في اي وقت

كمان عجبني تنسيقك للموضوع اوي يا شوشو

**Shoshou** · 24-08-2007, 10:31 PM

اكيد يا سمسم كلامك مظبوط.. الموضوع مش متوقف ع الفرد لوحده.. اكيد الظروف المحيطه بيه بتأثر تأثير جامد عليه..
ميرسي يا سمسم بجد لمرورك وردك.. وللمجامله الرقيقه دى يا رااافع من معنوياتى

ومنتظره اسمع رأى باقى الاعضاء..

ارق تحياتى..