¤¤¦‡¦ المصرى هو اللى..¦‡¦¤¤

**Shoshou** · #1 (**permalink**) 19-02-2007, 08:04 PM

المصري هو اللي لو عمل حاجة حلوة يبعت لجاره طبق يدوقه

وهو اللي لو لقى الدنيا بتشتّي يجري يخبّط عليك يقولك لمّ الغسيل
وهو اللي لو شم عندك حاجة بتتحرق يجري يطمن عليك لا تكون اتخنقت

وهو اللي لو سمع صوت زعيق وخناق عندك يجي يصلح

وهو اللي لو لقى خناقة في الشارع يقف يحوش مش بس يتفرّج

وهو اللي لو لقى حد بيغرق يجري ينط في الميه حتى لو هيغرق معاه

وهو اللي لو اتفرط منك كيس الجوافة في الشارع يقف يلمّ معاك
]المصري هو اللي لو حس انك مزنوق يعملك جمعية مخصوص و يقبّضك الأول

و هو اللي يقف معاك في الأحزان و الأفراح زي مايكون من بقية اهلك

و هو اللي يلمّلك من الركاب فلوس لو مرتبك اتسرق منك في الأتوبيس رغم انه مايعرفكش

و هو اللي لو لقاك في مواصلة و كان عارفك يحلف ميت يمين ليدفعلك الأجرة حتى لو مافيش في جيبه غير نص جنيه

المصري هو اللي يقعد معاك ع الفطار في رمضان

المصري اللي يشتري بالونات لولادك في العيد

المصري اللي يقف جنبك وانت بتدبح الاضحية
المصري اللي يباركلك لما ابنك يجيب مجموع ويساعدك يجيبله شغلانة

المصري اللي ييجي يقولك تجيب كشاكيل و أقلام بالجملة عشان توفر المصاريف

]طيبة المصري مش ممكن تلاقي زيّها فى اي بلد تانية

وانتوا ايه رأيكوا بقى ؟
شايفين ايه ف المصرى تانى ؟

مستنيه ردودكوا..

ارق تحياتى..

**SweeT AngeL** · 19-02-2007, 10:01 PM

بجد موضوع جميل
وفعلا يا شوشو هو ده المصرى اللى تلاقيه فى اى حته وفى اى ظرف واقف جمبك
وميرسى على الموضوع الجمي ده ومنتظرين المزيد

**LiMoO** · 19-02-2007, 11:28 PM

وعمره ما هيكون غير كده

ناس كتير فيهم بتغيروا انما اكيد برضو فيه ناس كتير كويسين

وهي دي حجات ما بتكونش غير في المصري

pop_a0 · 20-02-2007, 12:30 AM

انشالله ميرسي يا شوشو للموضوع

مع ارق التحيات ................

ahmed farag · 20-02-2007, 04:36 AM

الله عليك يا شوشو بجد والله موضوع جميل جدا

وربنا يقدرنا ونكون منهم وفينا الصفات الجميله دي

بجد ميرسي جدا علي مواضيعك الجميله دي شوشو