¤¤¦‡¦ سمعتوا عن موضوع فتيات الليل بتاع هاله سرحان ؟ ¦‡¦¤¤

**Shoshou** · #1 (**permalink**) 14-02-2007, 03:44 PM

السلام عليكم ورحمه الله وبركاته
ازيكوا كلكوا ؟
يارب تكونوا تمام
انا هدخل ف الموضوع على طول
طبعا اللى متابع الاخبار سواء ف الجرايد او التليفزيون او حتى ع النت.. اكيد هيكون سمع عن موضوع هاله سرحان والحلقه بتاعه فتيات الليل اللى اتذاعت على روتانا سينما

وبالنسبه للى ميعرفش هحكيله الموضوع بإختصار..
فيه حلقه هاله سرحان صورتها..على روتانا سينما.. المفترض انها هتعرض فيها 3 نماذج لفتيات الليل ف مصر
وانهم هيتكلموا ف الحلقه دى على الظروف اللى دفعت البنات دول انهم يبقوا كده.. وكان الاتفاق مع البنات دول انهم هيخفوا ملامح وشهم خالص.. وهيغيروا ف اصواتهم عشان محدش يتعرف عليهم.. تمام لحد هنا ؟

المهم عملوا اعلانات قبل الحلقه وانفراد وحصريا والحركات دى.. وبعدين الحلقه اتذاعت..
البنات كان وشهم ظاهر جدا.. مش مظللين بس غير على عنيهم.. وصوتهم كمان زى ما هو

يعنى ولا خفوا وشهم.. ولا غيروا ف صوتهم زى ما وعدوهم..
طبعا ده اللى كان ظاهر بس لحد من 3 ايام
برنامج 90 دقيقه اللى بييجي ع المحور اتولى التحقيق ف الموضوع ده.. وابتدى يكلم المسئولين ويستضيف صحفيين وناقدين اعلاميين والناس دى كلها..

المهم امبارح ف البرنامج ده استضافوا بنت م التلاته دول اسمها مروه.. ودى حقيقي شجاعه او جرأه كبيره منها

المهم البنت دى حكت الموضوع كله على انهم غرروا بيهم.. وان البنات دول اصلا مش بنات ليل..!!
وانهم اصلا كانوا بيروحوا على انهم من الكومبارس اللى بيقعد على انه جمهور ويسقف ويصفر والحركات دى..

وف الاخر بياخدوا من 30 - 50 جنبه..
الله ؟؟
امال قولتوا ليه انكوا بنات ليل ؟
قالت لان هاله سرحان قالتلهم انهم مش هيظهروا وكمان هياخدوا 400 جنيه وكمااان هتديهم وظيفه وانها هتشغلهم موديلز ف روتانا..
وطبعا الـ 3 بنات دول اتفضحوا ف الاماكن اللى هما ساكنين فيها.. وواحده فيهم خطيبها سابها.. وواحده تانيه اهلها جم م الصعيد وحالفين يموتوها

طبعا البنات دى غلطانه.. مفيش اختلاف ع النقطه دى..

بس النهارده بقى الصبح ببص ف جريده الدستور لقيت هاله سرحان بتقول ان الكلام ده كله كذب "ومن الطبيعي انها تكدب الكلام ده يعنى - مش مفاجآه"

المهم خلاصه الكلام اللى قريته ف الحوار بتاعها ان البنات دى فعلا بنات ليل.. وان الحوار كان صادق م البدايه.. وانها موعدتهمش بشغل ولا اى حاجه.. دى كانت بتصور معاهم وهما واعيين كويس للى بيوعملوه.. وقالت كده بالنص : "انا مشربتهمش حاجه اصفره قبل ما اصورهم"

وكمان قالت انها مش محتاجه تعمل موضوع زى ده عشان تكسب شهره او تعمل ضجه لانها اصلا مشهوره ومش محتاجه تكسب شهره بالاسلوب ده.. وبتقول ان البنات هما اللى عايزين يشتهروا وياخدوا حاجات مش حقهم على حسابها.. ولما سألوها ليه مش يتطلعى تدافعى عن نفسك ف التليفزيون.. قالت ان الحوارات دى مش مستواها...!

بصراحه حاولت اختصر ف الموضوع على قد ما اقدر.. بس كل اللى قولته تفاصيل مهمه مينفعش مقولهاش.. دلوقتى بقى بعد كل اللى قولته ده.. ايه رأيكوا ؟
شايفين مين اللى صح ؟
مصدقين هاله سرحان ولا البنات ؟ وليه ؟
انا مش عامله الموضوع ده عشان نبقى بنتكلم ف سيره الناس وكده.. اكيد مش ده هدفى
انا هدفى م الموضوع اننا نقول رأينا ونحاول نوصل احنا مين اللى صح..؟
"نحن نبحث عن الحقيقه" وكده

يلا بقى مستنيه رأيكوا..

ارق تحياتى..

abo_el3rby · 14-02-2007, 04:10 PM

السلام عليكم و رحمة الله و بركاته

على فكرة يا شوشو انا شوفت الحلقة دى بس مش كلها علشان فعلا حسيت انها "هفلطة و فرقعة فى الهوا" و على العموم انا مش بعترف بهالة سرحان كمذيعة و لا ببرنامجها كبرنامج الواحد يضيع فيه وقته .

اما بالنسبة للبنات فهما مش أهل ثقة علشان يثق فى كلامهم سواء فى برنامج هالة سرحان او البرنامج اللى على المحور لان كلامهم على التلفزيون فى كلا الحالتين مش بيخدم هدف نبيل زى اظهار الحقيقة للناس .

كلنا بنتفرج على التلفزيون و كلنا عارفين انا اكثر اللى فيه كدب و حركات هدفها تحويل وعى الناس عن حاجات مهمة لحاجات تافهة .

يعنى بأختصار مش ها يفرق فى الموضوع ده مين صح و مين غلط الناس عايزة برنامج يقولهم كيلو السكر ها يبقى بجنيه و ازازة الزيت ها تبقى بأتنين جنيه و اللحمة ممكن تتأكل فى الأسبوع أكتر من مرة دون أعراض جانبية على الميزانية العمومية لأى أسرة أو بيت بسيط .

ربنا يلطف بينا

**Shoshou** · 14-02-2007, 06:20 PM

رأيك عاجبنى جدا ابو العربى..
فعلا موفقاك جدا ان هاله سرحان مش معترف بيها كمذيعه.. كرأى يعنى مش عموما
وان البنات دول زى ما كدبوا ف روتانا مع هاله سرحان ممكن اوى يكونوا بيكدبوا ف 90 دقيقه ع المحور..
الله اعلم بقى..
ميرسي لمرورك واهتمامك يا ابو العربى..

ارق تحياتى..

**SOSO** · 14-02-2007, 08:04 PM

انا رايي برده يا شوشو قريب من رايي ابو العربي اصلا هاله سرحان دي ضحكوا عليها وقالولها انك ممكن تبقي مذيعه شاطره بس هيي لا شاطره ولا نيله بالعكس بقي
والبنات دول اصلا طبيعي جداا انهم يكذبوا ومن الممكن جداااا انهم يكونوا بنات ليل فعلا لانهم قبلوا علي نفسم حجات كتير اللي يخلي واحده تقبل علي نفسها انها كل مهمتها انهم من الكومبارس اللى بيقعد على انه جمهور ويسقف ويصفر والحركات دى..
وف الاخر بياخدوا من 30 - 50 جنبه.. تقبل جدا وبسهوله انها تبقي بنت ليل وتاخد 1000 جنيه ايه يعنى مش هتفرق معاهم

اشكرك جدااا يا شوشو مواضيعك كلها هايله والله بجد ومسنين المزيد ويارب للامام دائما

**Shoshou** · 14-02-2007, 08:38 PM

وده رأي برضو اتفق معاه يا سماح..
ميرسي كتير لمرورك وردك ومجاملتك الرقيقه دى

ومستنيه رأى الباقى..

ارق تحياتى..

**MaestrO** · 14-02-2007, 10:27 PM

بسم الله الرحمن الرحيم

اولا موضوع في ميعاده يا شوشو

ثانيا :

قبل لما ادخل علي النت بحوالي 5 دقائق بالظبط يوم 14 / 2 / 2007 الساعه 11:30 مساءاً

علي قناه " اليوم " كات اتصال هاتفي من مقدم الحلقة و هاله سرحان " كان اتصال صوت و صوره "

طبعاً هاله سرحان دلوقتي في " دبي " عمان يعني

طبعاً يا شوشو انا كنت سمعت الخبر انها هربت و اتضحلي فعلاً انها هربت بجد و سافرت اول لما عرفت ان البنات اعترفوا بالحقيقه

و المفاجأه في كل ده يا شوشو ان هاله سرحان جايبنها في قناه اليوم و كانوا بيتكلموا معاها علي الموضوع بتاع " بنات الليل " لاحظت انها قلبت الموضوع و اتكلمت علي موضوع تاني و هو " الاقصي "

و بعد كده مقدم الحلقة رجع سألها تاني في نفس الموضوع و كل شويه تهرب من السؤال

و في الاخر قال تحبي تقولي ايه دلوقتي ؟

قالتله انا واثقة في جمهوري و سكدتت شويه و بعدين دمعت

و بعدين قالتله يا ريت ابني " محمد " يحب مصر قوووي " انا مش فاهم حاجه بصراحه "

و ببعد لما قفلوا معاها اتصلوا بالــ " محامي بتاع هاله سرحان "

قعدوا يتكلموا شويه معاه و ايه الاحكام اللي المفروض تدخل بيها و هكذا لغايت لما المحامي قال كلمه غريبه شويه

" انه مقتنع بالبرنامج 100 % و نفسه البرنامج يتذاع في جميع القنوات

"

و بعد ذلك سأله مقدم الحلقة علي " ممكن يتهموا هاله سرحان " انها تددل الشائعات

المحامي قاله " اه " ----- بمعني اوضح يعني كده بقت في قضية

و طبعاً زي ما سمعنا يا شوشو ان ما شاء الله البنات طالبه مبالغ كبيره جداً

كل بنت طالبه " 100000 جنيه مصري "

بيقولوا " 70000 جنيه مصري " هيتبرعوا بيها للاقصي " و الباقي يخدوه

ما شاء الله --> طيب علي كده مين اللي هيدفع

بالنسبه للموضوع يا شوشو انا كنت من اول لما بتفرج علي مقدمات الحلقات قبل لما تتذاع كنت متشائم جداً

و لغايت دلوقتي متشائم

معلش يا شوشو في الكلمتين دول

لو هاله سرحان عندها حق في الموضوع ده

و تسأل البنت انتي بتكسبي كام في الشهر تقولها " 10000 جنيه مصري "

علي كده بقي دي بتشجع البنات اللي مش لاقيه شغل انها تمارس نفس العمل او البنت اللي محتاجه لفلوس

هيه كده مش بتحل دي كده بتعقدها خاااااااااالص

و انا من الاخر يا شوشو علشان مطولش

انا ضد هاله سرحان تماماً

علي راي واحد صحبي

واحده مصاحبه " يســـرا و ايناس الدغيدي " هتكون عامله ازاي

زي بالظبط " واحد مصاحب علي علوكه و اشرف كوخه " اللمبي

شكلي طولت عليكي يا شوشو بس حبيت اتكلم علي اللي شايفه بيحصل

موضوع اكثر من رائع شوشو

و منتظرين مواضيع متميزه دائماً ....

**Shoshou** · 14-02-2007, 11:19 PM

اقتباس:

المشاركة الأصلية كتبت بواسطة MaestrO [عزيزي الزائر يتوجب عليك التسجيل لمشاهدة الرابط للتسجيل اضغط هنا ]

علي راي واحد صحبي

واحده مصاحبه " يســـرا و ايناس الدغيدي " هتكون عامله ازاي

زي بالظبط " واحد مصاحب علي علوكه و اشرف كوخه " اللمبي

ههههههههههههههههههههههههههههه
على رأي صحبك والله يا محمد.. معاه حق

وميرسي كتير لمحمد عبد المنعم - مراسلنا من بورسعيد

ومستنيه رأي باااقى الاعضاء..

ارق تحياتى..

ســــــامح==>CrAzY · 15-02-2007, 12:29 AM

والهى يا شوشو موضوع حلو

انا طبعا سمعت وقريت و كل حاجه

وانا من زمان مش بحب هاله سرحان لانها بتخوض مواضيع تافهه وهايفه " وده كان سبب طردها من دريم "

واسلوبها يعتبر وقح مش جرىء

انا من زمان بقول عليها انها بتاعت فبركه والكلام ده

ولما شفت الاخبار بتاعت البنات دول اتأكدت

بس فى برنامج القاهره اليوم بتاع عماد اديب استضاف واحده قالت انها اخت واحده من البنات التلاته اللى هما بتوع

الموضوع اصلا

المهم الست دى قالت ان اختها وصحابتها فعلا كانو بنات ليل بس هما تابو !!!!!

وقال ايه هى كمان كانت شغاله فى بار و بعدين تابت

وقالت ان البنات التلاته اقولهم متناقضه و معرفش ايه ..... م الاخر يعنى بتحاول تطلع هاله سرحان

فالصراحه الواحد مش عارف يصدق مين ولا مين ولا مين

بس اللى انا متأكد منه من زمان ان هاله سرحان متصلحش اعلاميه خالص وربنا يستر على ولايانا معلش طولت بقى

وتسلم ايديك يا شوشو

ahmed farag · 15-02-2007, 04:32 AM

ميرسي شوشو علي الموضوع الحساس
بس باختصار الاخوة الاعضاء قالوا كل اللي كل كنت عايز اقوله
يعني الجميع متفق علي عدم احقيه هاله سرحان بما وصلت اليه من جماهيريه لاعتمادها علي وماضيع هايفه
وكلنا يفتكر هاله سرحان وطردها من دريم والسبب معروف طبعا
من الاخر هي دي هاله سرحان اللي اتعودنا علي سخافتها واستظرافها وعدم تغميض عنيهيا واجبار الضيوف كمان علي ( مش هتقدر تغمض عينيك) .
ميرسي كتييييييييييييييييييييييييييير شو شو لمواضيعك الشيقه

mizo11 · 15-02-2007, 03:34 PM

ميرسي يا شوشو علي الموضوع المهم دة .
وانا كنت اتفرجت علي حلقه لهاله سرحان كانت بتتكلم علي الادمان من ناحيه البنات وبصراحه انا مع رائ كل الاعضاء في الموضوع بتاع بنات الليل.
وحبيت ااكيد كلام اسلام(ابو العربي)وانا معاة في الي قاله.
ميرسي للموضوع شوشو ومنتظرين المزيد..
مع ارق تحياتي....