هل البنت الغير محجبة غير محترمة؟!!!!

**Devoted** · 16-01-2007, 02:36 AM

هو انا بأيد رأى اسلام فى الحتة دى (الناحية التانية ان الحجاب معنى كلمة حجاب انها تكون محجبة شعرها وجسمها )
وبأيد رأى مايسترو بردو فى الحتة دى (لان البنت عرفه الصح من الغلط )
مين قالك كدة يا أحمد (السعوديه مثلا البنت الي مش محجبه تعتبر بنت مش محترمه ) لأ طبعا هناك بردو فى حرية شخصية بس هما اغلبيتهم متمسكين بالحجاب شوية ويمكن مش الحجاب النقاب بمعنى اصح
ومش معنى انها مش لابسة الطرحة تبقى مش محترمة انا عن نفسى اعرف بنات مش بتلبس طرح بس انت تقف قودمها تخليك تحترمها غصب عنك

وفعلا الموضوع مش محتاج رأى ولا اتنين محتاج اراء ومحتاج كلام كتيير

بس مشكور يا بوب على الموضوع المهم ده

pop_a0 · 16-01-2007, 04:27 AM

شكرا يارؤف و احمد علي الاهتمام بالموضوع ده

**klkashndy** · 16-01-2007, 09:36 AM

بص يارورو
اولا بالنسبه لموضوع ان السعوديه او الازهر او غيرهم فانا لسه عند رايي ان البنت الي مش محجبه لا وممكن مش بس الي مش محجبه لا وكمان الي محجبه ومطلعه شوية شعر من الايشرب من قدام لا ومش كدا وبس لا كمان الي مش منقبه في السعوديه تحديدا بيتبصلها بصه تقلل من احترامها

الي بيحصل يارورو ان الي بيخالف تقاليد او اعراف اغلب الناس بتمشي عليها غالبا بيتهموه بانه عندو غلط او خلل في الحته الي هما مختلفين فيها مع بعض لان على فرض انه ماحدش اتهمه بانه غلط والكل شاف ان الي بيعملو عادي يبقى ليه هما كمان مايعملوش زيه وايه لزمتها انهم هما الاغلبيه وهوا الحاله الشاذه؟

هانفرض مثلا يارورو انك شفت ولد ماشي بشورت جوا الجامعه ودخل بالشورت المحاضره تفتكر فكرتك انت والي حواليك عنو هاتكون ايه؟
غالبا هاتكون مش في صالحو وانت عارف هايتقال عليه ايه خصوصا من الولاد
دا بالرغم انه ممكن يكون انسان عادي ومحترم ودا بالرغم برضو ان كلنا بنلبس شورت.....
يعني الاغلبيات والاعراف بتحكم المجموعه وتحطلها قوانين خاصه تخلي الي يخرج عنها اما غلط او عندو مشكله ودا مش موجود عندنا لان عدد الي مش محجبات كتير ولان الحجاب مش فريضه على المسيحين

هارجع لحتة البنت عارفه الصح من الغلط.....
انا معاكو ان ممكن تكون عارفه الصح من الغلط
لكن مش شرط يكون سبب الفرض علينا اننا نوعيها ونقولها الصح انها مش عارفاه من الغلط ولكن بنتكلم معاها لانها برغم معرفتها بالصح والغلط الا انها مش اكتر من معرفه ومعلومات مش بتطبقها وواجب علينا اننا نتكلم مش على سبيل اضافة المعلومه ولكن عشان تخرج المعلومه من حيز المعلومه لحيز التنفيذ

ولو هاناخد بمبداء ان كل واحد عارف الصح من الغلط يبقى لازم نعممه على كل حياتنا ونلغي حاجه اسمها نصيحه ونلغي حاجه اسمها انتقاد لان كل واحد عارف الصح من الغلط

وشكرا

**Shoshou** · 16-01-2007, 12:07 PM

طبعا يا بوب موضوع جميل.. ومعلش اعذرنى انا هطول شويه ف الرد لانى هرد عليك.. وهعلق ع الردود اللى اتقالت..

اولا بالنسبه للبنت المحجبه مش بالضروره ابدا انها تكون محترمه.. هى ممكن تكون اتحجبت لان اهلها فرضوا عليها كده.. او لان هى كبرت لقت مامتها واختها وخالتها وعمتها و و و محجبات.. ف عرفت ان المفروض انها تتحجب.. او هقوللك حاجه بس بكلمك بجد والله.. انا اعرف واحده اتحجبت لان شعرها مش حلو

يعنى ملهاش اى علاقه بالتدين..
والعكس.. بالنسبه للبنت اللى مش محجبه.. فيه بنات كتير مش محجبات ومتدينين وبيعرفوا ف الدين كويس اوى.. بس زى ما انت قولت كده.. شايفين انهم يتحجبوا لما يكبروا "وده غلط كبير طبعا"
ف انا من رأيي ان سواء البنت محجبه او مش محجبه ف ده منظر خارجى مش شرط ابدا يكون بيعكس المنظر الداخلى..

وزى ما قال ليمو..

اقتباس:

المشاركة الأصلية كتبت بواسطة LiMoO [عزيزي الزائر يتوجب عليك التسجيل لمشاهدة الرابط للتسجيل اضغط هنا ]

بمعنى ان مش مجرد ان البنت تغطى شعرها انها تكون محجبة من ناحية انك ممكن تلاقي بنت مغطية شعرها بالكامل انما طريقة لبسها مش مظبوتة او انها مش مدارية جسمها كلو ، وممكن برضو تلاقي بنت مغطية شعرها بس مش كله يعني اي حاجة لمجرد ان الناس تقول انها محجبة انما لو دققت وقربت هتلاقي ولا كأنها عاملة حاجة .

فعلا فيه بنات مش ببقى فاهمه هما لابسين الحجاب ليه ؟؟!
يعنى اوقات بيلبسوا قصير.. وضيق.. وعادى برضو لابسين ايشارب.. طب ايه لزمه الحجاب ف الموضوع ؟

بالنسبه بقى لمحمد

اقتباس:

المشاركة الأصلية كتبت بواسطة MaestrO [عزيزي الزائر يتوجب عليك التسجيل لمشاهدة الرابط للتسجيل اضغط هنا ]

القصه كلها يا بوب في حاجه واحده " انا شايف انها حرية شخصية " للبنت

اوك يا محمد مش احنا اللى هنتحاسب بس هنتحاسب اننا منصحنهاش.. او موجهنهاش..
ومع كامل احترامى لرأيك يا محمد.. انا مش شايفه ابدا ان الحجاب حريه شخصيه..
الحجاب فرض..
زيه زي الصلاه بالظبط.. الصلاه فرض.. مينفعش نقول عليها حريه شخصيه..
نفس الكلام يتطبق على الحجاب..

بالنسبه لكلام احمد..

اقتباس:

المشاركة الأصلية كتبت بواسطة klkashndy [عزيزي الزائر يتوجب عليك التسجيل لمشاهدة الرابط للتسجيل اضغط هنا ]

في نقطه تانيه ان انا شخصيا في وجهة نظري مش بحترم الست الكبيره الي عدت سن الشباب ولسه ماتحجبتش لان دا وان كان مش بالضروري يدل على انها انسانه بايظه او اخلاقها فلتانه بس ليه مدلول تاني عندي وهيا انها انسانه ماعندهاش وعي ومش عارفه مصلحتها وعقلها طفولي جدا

موفقاك جدا ومعنديش اى تعليق عليه.. غير انى متفقه جدا معاك ف دى..

اقتباس:

المشاركة الأصلية كتبت بواسطة Devoted [عزيزي الزائر يتوجب عليك التسجيل لمشاهدة الرابط للتسجيل اضغط هنا ]

انا عن نفسى اعرف بنات مش بتلبس طرح بس انت تقف قودمها تخليك تحترمها غصب عنك

بالظبط كده.. ده تأكيد ع الكلام اللى قولته ف الاول..
المهم شخصيه البنت عامله ازاى.. مش المظهر الخارجى ليها..
موفقاك اكيد يا رؤوف ف دى..

وسورى لو طولت يا جماعه بس بجد موضوع جميل..
ميرسي كتير لطرحه يا بوب.. ومنتظرين المزيد م المواضيع الجميله اللى بتعتمد ع الحوار دى

ارق تحياتى..

pop_a0 · 16-01-2007, 01:35 PM

ان شالله مرسي يا جماعه علي الاهتمام بالموضوع ده بس رأي شوشو جامد جدا وخصوصا انها ادري مننا بالموضوع ده علي العموم شكرا لكل من اهتم بالموضوع وافاد حاجات ممكن ميكونش حد عارفها