اطفال زمان...اطفال دلوقتي (2)

ريد روز · #1 (**permalink**) 28-04-2005, 10:51 PM

[grade="00008B FF6347 008000 4B0082 B22222"]اطفال زمان / دلوقتى

الطفل لما يحب يلعب

ايام زمان:- كان الولد كبيره يلعب الكورة مع اصحابه او قاعد فى البيت بيلعب بعربية او اى لعبه عنده
دلوقتى :- تلاقى الولد داخل على مامته ..... ماما عايز فلوس ..... ليه يا حبيبى ..... نازل السايبر العب مع اصحابى .... سايبر ايه البتاع ده يا ابنى " ده اسم نادى ده ولا ايه " ؟؟؟؟
ياااااه نادى ايه وبتاع ايه مش هاتفهمينى اصلك " واللى بيتكلم ده كبيره 8 سنين " بصى ده مكان مليان كمبيوترز وبنلعب فيه ... يا ابنى ما انت الكمبيوتر عندك جوه .... يا ماما لا احنا بنكون كلنا على شبكة واحدة " نقتل فى بعضنا براحتنا !!!! .." برده مش هاتفهمينى يووووه انتي ايه بس اللى دخلك فى الموضوع من الآخر فكك مني وكبري جمجمتك وهاتي الفلوس.

عـــيد الميــلاد

زمان:- الولد او البنت فى البيت لابس طرطور وفى بقه صفارة وحواليه كام واحد من اصحابه واهله وخلاص.
دلوقتى :- العيد ميلاد لازم يبقى (فى كافيه او نادي او احدى المحلات المشهورة) بيت ايه اللى هيعمل عيد ميلاده فيه انت عايز الناس تضحك عليه؟؟ والاظرف والاحلى ان فى عيد ميلاده لازم تبقى جنبه صاحبته (الجيرل فريند يعني)!!! لسه مطلعش من البيضة وبيصاحب امال لما يكبر هيعمل ايه ده احنا مكناش اطفال باه .

بــــدء الكلام

زمان بداية الكلام تبقى ماما....بابا
دلوقتي :- مفيش حاجة تيجي كده . اخاصمك اه ...اسيبك لا (لسه متعلموش الحروف وتلاقيهم بيغنوا مع التليفزيون)

Dish Party

زمان:- الحفلات كانت بتبقى حفلة عيد ميلاد وبتبقى فى مكان قريب يعني الجار اللى فى وش الباب او بكتيره العمارة اللى قدامهم.
دلوقتى:- البنت حلوة جميلة كده عندها 9 سنين داخلة على مامتها ...ماما انا معزومة على ديش بارتي, وماله يا حبيبتي روحي الحفلة وفيها ايه يعني..ايوة يا ماما بس انا عايزة الديش بتاعي يبقى مميز..ديش ايه يابنتي اللى بتقولي عليه ؟؟؟ هو البتاع ده غير اللى احنا بنتفرج عليه ؟؟؟ (قصدها الدش )انتي مش بتقولي بارتي ...يا ماما افهمي !!! ديش بارتي ده كل واحدة بتجيب من عندها طبق اكل مختلف وبنتجمع مع بعض وتبقى البارتي..ايه ده من امتى ده؟؟ ده اختراع جديد ولا ايه ؟؟معلش يا بنتي اصلي لما كنت فى سنك لا كنت اعرف ديش ولا هيش اخر حاجة اعرفها كان اسمها عيد ميلاد مكنتش اعرف ان فى حفلات تاني..هى نزلت فى المقرر جديد ولا ايه

معلش اهو اللي يعيش ياما يشوف بارتيز

الاستيكة والبراية

زمان:-الاستيكة على شكل كتاب او قلم (حاجة ليها صلة بالعلم)
دلوقتي:-اتفرج على مقلمة الاطفال...الاستيكة او الصمغ على شكل قلم صحيح بس قلم روج

والبراية على شكل مشط..وبالنسبة للبنت تدوخ مامتها لما تيجي تشتري ادواتها لانها عايزاها لون بمبي وكلهم يبقوا لون واحد . ( هو يعني لو لون تاني القلم هيقول لا مش كاتب والاستيكة مش هتمسح ؟؟اولا اللون ده بيكتب لوحده؟)
اما الولد فميتعبش اهله فى حكاية الشرا ديه لانه اساسا مش فارقة معاه لان معندوش حاجة اسمها مقلمة ولا الحاجات ديه.لو اشترى يبقى قلم ويحطه فى جيب البنطلون وكشكول واحد للسنة كلها ويحطه فى الجيب التاني وماشي باشا (امال هو لسه عيل علشان يشيل شنطة مدرسة؟؟؟لا ده راجل والشنط ديه للبنات!!!)

طموحات الاطفال

زمان:- كنت تسال البنت تقولك مثلا احب ابقى دكتورة علشان اساعد المحتاجين او مدرسة اعلم الاطفال ...والولد ابقى شرطي علشان ادافع عن بلدى او طيار او دكتور.
دلوقتي:-البنت ترد تقول لا لا شغل ايه .انا لما اكبر مش هشتغل ايه التعب ده مش كفاية عليا التعليم ..لا انا هتجوز واقعد فى البيت..اصل انا سمعت ماما وهى بتقول لجارتنا طنط فيفي الست فى الاخر ملهاش غير جوزها وعيالها

على ايه باه وجع الدماغ انا اقعد فى البيت وهو يروح الشغل وانا اخد الفلوس

مش كده احسن؟؟
اما الولد انا نفسي ازوغ من التجنيد واشوفلى حتة متنقية كده (يعني بنت حلوة ) اتجوزها ونهج من البلد ديه بأه باللي فيها.

الطفل الشقي

زمان:-مهما كانت الشقاوة مكنش فيه الامكانيات اللى تخلى الولد يمارس شقاوته فى البيت يعني لو بيحب الرعب مثلا كبيره هيقفل النور ويستخبى ورا باب ويطلعلك مغطي نفسه بملاية زى عفريت وخلاص.
دلوقتى:-مع كل ادوات الرعب الحديثة تعالوا نشوف ولد شقى جداا بيحب الرعب ويرعب الاخرين...تصور انت لوحدك داخل بيت عمك اللى ادالك المفتاح وقالك ان ابن عمك الصغير قاعد لواحده فى البيت وطلب منك تروح تطمن عليه,المهم انت داخل البيت مش واخد خوانة لقيت النور مقطوع ( طبعا هو مش قاطع انما الولد فاصل الكبس بتاع الكهربا ) المهم قلت تطمن على الولد طبعا انت ماشي فى الضلمة وبتنادي عليه مفيش اثر..قلت تشوفه يمكن نام فى غرفته دخلت لقيت نورصغير اوي من تحت قماش متعلق على الحيطة طبعا بفضولك اللى هتندم عليه روحت تشوف فى ايه ...شيلت القماش..لقيت هيكل عظمي بلاستيك طويل مبرق فى وشك ( يالا بالشفا ادي اول خضة لزميلنا ) يادوب لسه مفوقتش حسيت بحاجة سودا عدت من وراك ( خير انشاء الله ) المهم طلعت ولاعة ونورت بيها بتبص مفيش حاجة ولقيت حتة قماش سودا من تحت السرير برضه بفضولك منه لله روحت تبص لقيت وش حاجة بشعة شعر منكوش , عين بتنزل دم , بق مفتوح مليان سنان من الاحجام الضخمة ( يالا بالشفة ادي تاني خضة ) طبعا بسملت ودمك هرب المهم طلعلك الاستاذ (اللى عمك خايف عليه..يا خبر ده لو الخوف شخص كان علمه الفضيلة) المهم الولد كان لابس وش من بتوع اليومين دول ولابس زى دراكولا وقعد يضحك قالك انت اتخضيت ولا ايه؟؟(ده سؤال بالذمة ده الخضة كلمة صغيرة) بعد كده قلع الوش اللى كان لابسه وقرب منك طبعا بيكلمك وانت لسه مش قادر ترد قالك طيب انا هديلك حاجة تروق بيها دمك مد ايده فى جيبه وعلى اساس انه ولد صغير يبقى المفروض انه يبقى معاه بونبون او شيكولاته.المهم بالفعل طلعلك لبانة وقالك خد ديه وانا هجيبلك ميه طبعا انت اخدتها وعلى بقك على طول (ساذج) طبعا طلعت مقلب من مقالبه لبانة بالشطة (بالهنا والشفا) بقك ولع ناااار..سمعت الولد بيصوت من المطبخ وافتكرت انه راح يجيبلك الميه (كان فتح كبس الكهربا وطبعا انت مش فارق معاك نورلانه عندك باه كله ضلمة) روحت تشوفه لقيت رجله مليانة دم وحواليها دم وسكينة واقعة جنبه قالك الحقنى ماخدتش بالى السكينة وقعت على رجلى فتحتها وعمال يصوت انت طبعا دمك نشف وحريقة فى بقك شيلته تنزله على المستشفى لاقيته بيضحك وقالك ده مقلب!!!!!ديه بودرة بتتحط على الميه بيبقى لونها احمر وقعد يضحك..وانت هتفرقع وقالك انا حطيتلك ميه فى كوباية ( الكوباية مش شفافة ) علشان تبرد بيها الحريقة..قالك عليها طبعا انت عايز تطفي النار شربتها منغير ما تاخد بالك انها سفن اب وانت فى بقك شطة طبعا ولعت زيادة وانا لو منك يا اولع فيه يا اولع فيه اختار انت باه .

[/grade]

**babys_cuteness2** · 28-04-2005, 11:05 PM

مشكور علي موضوعك يا برنس

ريد روز · 28-04-2005, 11:09 PM

ههههههههههههههههههههههه العفو بس برنس ديه موش صعب انها تتقال على بنت

Asmaa ONLY · 28-04-2005, 11:15 PM

اكيد طبعااااااا هولع فييييييييه........

مش بس هولع فييييييييه

دا أناااا من أقرب شباك بعد أما أولع فيه أرميه منه..

موضوع تحفة جداااااا يا ريييييييد...........

والله كلامك صح.......

الأطفال دلوقتي بقوااا عفاريت ومتشرديييييين......

بس موضوع عسول جدااا وعجبني جداااا