الضيف الثامن - LiMoO

**LiMoO** · 18-04-2008, 11:41 AM

اة على مجموعة شوشو التانية، دخلت في جد الجد اوي

ربنا يسهل ونجاوب على الاسألة كلها ان شاء الله.

- اكثر اللحظات اللي بتألمني هي الفشل، لكن مش لدرجة هلاك.

- الظلم.

- مفيش فرق، جميل الانسان يقدر يعبر عن مشاعره بالطريقة اللي تناسبه.

- مفيش حاجة صعبة، الحب مفيش مشكلة ان الواحد يعترف بيها، والكراهية مش بعرفها.

- اي شئ يطلبه مني يكون في امكاني اني اقدمهوله مش هبخل عليه بيها اكيد.

- اي انسان مظلوم، اي انسان عزيز عليا.

- هحبه من بعيد.

- هبعده عن طريقي بأي شكل.

- اني احوله لواقع ادام الناس كلها.

- موضوع فاشل.

- في رأيي لاء، القلب مش بيتقسم لاتنين.

- اي طريقة بيكون فيها الحب من طرف واحد هرفضها، لازم يكون في تقابل بين اللي بيحب واللي بيتحب.

- اكيد هصارحها، مفيش حاجة بتستخبى.

- من ناحيتي انا هفضل مرتبط بيها، انا صحيح بشجع تعدد الزوجات، بس مش بحب اطبق الموضوع على نفسي.

---------------

شوشو الاسألة كانت جميلة جداً، وأتمنى ان الجواب يكون في محله.

وآسف بجد لو كان في تأخير على اي اسألة في الموضوع.

**babys_cuteness2** · 18-04-2008, 02:21 PM

كفاية كده عالراجل يا شباب
تسلم يا اسلام لمتابعتك واكيد كلنا بحصلنا ظروف خارجه عن الاراده
بس جاوبت كل الاسئله وبسم الله ما شاء الله هي دي طبيعتك فعلاً
ومن خلال معشرتي ليك اجابتك صحيحه
ويوفقك ربنا ان شاء الله
ومنتظرين التحليل

**Ni9ht** · 18-04-2008, 04:41 PM

ادينى يوم الجمعة خلاص و الحمد لله حلقة جميلة جدا و اكتر من رائعة

دلوقتى باب الاسألة خلاص و مستنين شوشو تيجى تحط تحليل الشخصية و يبقى لينا التعليق على التحليل

بجد يا سمسم الحلقة جميلة جدا و انا واحد من اللى استمتعو جدا بالحلقة الحلوة دى

و مستنى تعليقاتك على التحليل و ان شاء الله ديما نشوف بتاخد حقك من كل اللى سألك و تورطة معانا اكتر واكتر

:c lap:

تحياتى للجميع

**Shoshou** · 19-04-2008, 02:22 AM

السلام عليكم ورحمه الله وبركاته..
للاسف الحلقه خلصت بسرعه اووووى

والاسبوع فات من غير ما نحس بيه..
وده طبعا لأن الضيف كانت ورطته من احلى الورطات اللى اتعملت

وانا عن نفسى ليا الشرف انى انا اللى هعمل تحليل الحلقه دى..
ومش هيكون التحليل بناء على رأيي الشخصى.. لأ اكيد هيكون بناءً على الاجابات.. لأنه لو بناءً على رأيي الشخصى هكتب فيه مواضيع من رد واحد..

مش هطول عليكوا وندخل ف التحليل على طول..

اسلام شاب مصرى مسلم من مواليد 1987 ، برج السرطان ، بيدرس ف كليه الحقوق ان شاء الله آخر سنه ف جامعه عين شمس.. بيحب مجال دراسته لأنه مفيد ف الحياه عموما مش بس للشغل.
بيقضى يومه وسط اهله وصحابه وبيكون على طول فيه صله وكلام بينه وبين البنت اللى بيحبها " انا يعنى"

اجتماعى وليه صحاب كتير من وزملاء دراسه ونقدر نقول ان صحابه من بورسعيد اكتر كتير من زملاء الدراسه.

ف مرحله الطفوله كان شقى وه طبعا واضح من كلامه عن الجرى والحاجات اللى بتحدف من البلكونه.

بعد مرحله الطفوله شويه مكنش بيحب الرياضه وبدل كده اتعلم الصيد وظهر حبه ليه وده اللى اكسبه صبر بنسبه كبيره اوى.. وكان بيحب الرسم اوى بس تقريبا خلاص مبقاش.. عشان مفيش ممارسه.

كان متفوق دراسياً جدا وبيطلع م الاوائل بس بسبب ظروف اتعرضلها ابتدى يهمل دراسته للاسف. وللاسف برضو بدأ التدخين ف الفتره دى ولحد دلوقتى

احلى ايام حياته قضاها ف المرحله الجامعيه.. لما كان وقته بيقضيه بين بورسعيد والقاهره واسكندريه..
بيفكر ف مستقبله كتير خصوصا الفتره دى.. لأنها تعتبر فتره انتقاليه بحكم انه هيتخرج ان شاء الله.
بالنسبه للتعامل ف البيت ف كان فيه دايما نوع من الرقابه لحد فتره معينه ، بس بعد كده ابتدى هو يحس بالمسئوليه اوى خصوصا وهو خارج بلده.. وده طبعا عشان ميخيبش ظن اهله فيه.. ولأن اسلام مش بيحب يعمل مشاكل ، فيه نوع من انواع الحساسيه بس هو قادر يتأقلم مع الوضع وممشى اموره.
طريقه تفكيره تحليله بشكل كبير اوى.. وبيفكر كتيييير اوى ف كل حاجه.. حتى ف ادق التفاصيل.. اسلام دايما بيكون دماغه شغاله

ويمكن ده سبب م الاسباب اللى بتخليه مش بينام على طول.
عنده اراده قويه ولما بيحط حاجه ف دماغه بيوصلها حتى لو الوقت طول ،مثقف اوى وده طبعا نتيجه لحبه للقراءه والاطلاع ع الجديد ع النت ، عنده ثقه ف نفسه لكن مش غرور.. لأنه ف نفس الوقت متواضع جدا وبسيط ف تعاملاته ، مش بيعرف يكره وبيسامح بسهوله ، بس ف نفس الوقت بيتعلم اوى من اخطاءه ، يعتبر كتوم او مش بيحب يشيل همه لحد لأن ف نظره كل واحد فيه اللى مكفيه ، بس بيتكلم مع بعض الناس القريبين ليه لأن الانسان لو فضل كاتم ف نفسه كده ممكن ينهار ، وعنده ثقه ف صحابه ومعارفه اللى حواليه بنسبه كبيره.
ابتدى دخوله ع النت من سنه 2000 وده قربه من اشخاص كتير وابتدى يجرب الشات وتصفح المواقع عموما واكتسب خبره عموما ف موضوع النت وفهم سلبياته وايجابياته كويس.
مش بيحب يزعل حد منه خصوصا لو كان قريب منه ، بيكون مبسوط اوى وهو مع صحابه

ومعايا

اوقات بيحس انه بعيد عن ربنا.. واقات تانيه بيحس انه قريب اوى منه.. وده طبعا شئ طبيعي بنمر بيه كلنا.. بس غالباً اسلام بيفكر ف ربنا قبل اى تصرف.
بما انه بيفكر كتير ف اى تصرف بيتصرفه بيكون ناتج عن تفكير.. مش متسرع ف قراراته.. عشان كده بيكون متحمل اى نتيجه هتحصل.. وعشان كده برضو صعب يندم على حاجه عملها.. لأنه بيكون دارس الموقف اوى.
بيحس بالضعف لما يكون فيه موقف هو قدامه ومش قادر يغيره.
بيحب القراءه والصيد وبيبقى راضى عن نفسه لما ينجز اللى مطلوب منه ويحس انه مش مقصر ف حاجه.
معارفه وصحابه والناس القريبين منه فيه كتير منهم هنا ف المنتدى.. ومنهم كتير بيرتاحلهم ومرتبط بيهم.
مرتبط.. وطبعا دى حاجه مش خفيه يعنى

والحمد لله بيحب الانسانه اللى مرتبط بيها.
بيفكر كتير ف احوال المسلمين والعرب عموما دلوقتى والحال اللى وصلناله..
بيحب الصراحه اوى.. وبيكره الكدب اوى اوى اوى.. ممكن دموعه تنزل لأنه انسان وبيحس لكن مش ادام حد.. وبيكون بينه وبين نفسه من غير ما حد يحس بيه.. وبالتالى نقدر نقول دموعه بعيده.
اخته الصغيره اقرب حد ليه ف اسرته او عيلته عموماً.
بيكره اليهود زيه زى اى مسلم طبيعي.. بيحب يكون غامض نوعاً ما.. مبادئه ثابته ومش بتتغير مع الوقت..
لما بيزعل اوى او بيتنرفز اوى بيفضل انه يسكت.. بيهتم اوى بالمواضيع التقنيه والاقتصاديه لأن الاقتصاد بيعبر عن حقيقه احوال كتير اوى..
بيحلم يكون راجل ناجح ف شغله وف اسرته.. بيحب ف نفسه الهدوء وبيكره ف نفسه الكتمان لأنه اكيد بيتعبه ف الآخر..
بيحب السعوديه ويتمنى يعيش فيها.
بيكره الخيانه والظلم وبيكره اكتر ان حد يكون واثق ف اسلام ويحصل موقف يهز الثقه دى وخصوصا لو كان الموقف خارج عن ارادته او سوء تفاهم.
اسلام عاطفى بشكل كبير وبيحس باللى حواليه.. وممكن اوى نفسيته تتأثر عشان خاطر حد بيحبه او قريب منه.. ذكى جدا ومش بيحب الانتقاد ف اى وقت.. ولا بأى طريقه.
حساس ولطيف ف تعاملاته مع الناس.. بيحب الفن جدا ونقدر نقول ان اسلام متكلم اوى.. يعنى عنده القدره على مواجهه مواقف فيها كلام.. بمعنى اصح تفكيره مش بيخونه وقت ما يحتاجه ، بالعكس.. بيقدر يعبر عن اللى عايز يقوله وبسهوله.

بيفكر ف ادق التفاصيل وعشان كده مش بينسى بسهوله.. كان ف الحضانه بيعانى من نوع من انواع الاضطهاد على حسب كلامه

بيحاول يحافظ على هدوء اعصابه حتى ولو كان جواه بركان غصب.. بس ده لأنه بيشوف ان العنف او العصبيه ممكن اوى تضيع حقه.. مش معنى كده انه مش بيتعصب ، اكيد لأ.. بيتعصب اوقات بس نقدر نقول عليه "اتقى شر الحليم اذا غضب"

مقتنع تمام الاقتناع ان كيدهن عظيم

مؤمن جدا بالقضاء والقدر.. وان اللى كاتبه ربنا هو اللى هيكون.. بيقدس الصداقه وبيشوفها علاقه فوق اى مصلحه.
مش م النوع اللى بيظلم حد.. لكن حس بالظلم ف فتره ثانويه عامه بالتحديد من اهله ف البيت.. بيحب يناقش اموره الخاصه مع الانسانه اللى بيحبها بحكم انها اقرب حد ليه.
حكمته ف الحياه "مازال المرء عالماً ما طلب العلم, فإذا ظن انه علم فقد جهل"
بيحب التحدى والمنافسه جدا.. وبالتالى بيحب النجاح ف اى مجال يدخله.. واثق من مكانته عند الناس .
ممكن يدافع عن حبه بأى وسيله.. وبيعترف بتعدد الزوجات.. لكن مش على نفسه

ف المجمل اسلام شخصيه مختلفه جدا.. ونادر وجود شخصيات كتير زيه..
مش عايزه اكون طولت عليكوا.. بس بجد اسلام صعب يتوصف ف كلمتين.. لأن حتى اللى كتبته ده قليل عليه.. بس ف الاول وف الاخر التحليل ده بناء على اجاباته.. وأكدت عليه بحكم معرفتى الشخصيه بيه

يارب اكون وُفقت ف التحليل.. وهستنى التعليق

ارق تحياتى..

**Ni9ht** · 20-04-2008, 08:09 AM

ماشاء الله ياشوشو مسكتى اسلام حللتى شخصية بالظبط ربنا معاك يا ليموووووووو و مستنين رايك فى التحليل

**LiMoO** · 27-04-2008, 03:39 PM

ما شاء الله عليكي يا شوشو
ربنا يحميكي ويخليكي لينا

طبعاً مش هقدر ازود حاجة على الكلام اللي موجود شوشو مخلتش حاجة...
ولو ان الرد جه متأخر بس الحلقة بجد استمتعت بيها، وحسيت بجد اني كنت في ورطة...
وشكراً لكل الناس اللي مرت وسألت بالموضوع...
أرق تحية.