¤¤¦‡¦ مصر.. الحب المستحيل ¦‡¦¤¤

**Shoshou** · #1 (**permalink**) 24-01-2008, 04:48 PM

السلام عليكم ورحمه الله وبركاته
ازيكوا كلكوا ؟
ان شاء الله تمام وبخير
كنت عايزه اتكلم معاكوا ف موضوع كده..
ليه دايما احنا متحاملين على مصر !!
ليه كل ما نتكلم عن بلدنا نقول دي بلد بنت ستين وتستاهل الحرق وامته الواحد يهج بره في أي حته !!
بجد ليه كل ما نيجي نعرض حاجه نقوم جايبين الجانب الوحش ف مصر !!

هو في أصلا جانب حلو ف مصر ؟؟

السؤال ده سألته في نفسي بعد ما قريت تعليق لواحده بتقول انتوا ليه متحاملين على مصر وكل شوية تجيبوا صور عن الوحش اللي فيها !!
مصر فيها حاجات كتير حلوه ..

كلامها ده بصراحه خلاني افكر مع نفسي كتير .. ياترى أنا باحب مصر أساساً !!
خطر في بالي حسين فهمي في فيلم مافيا وهو بيقول لأحمد السقا انت مش بتحب امك عشان هي أجمل واحد في الدنيا انت بتحبها عشان هي أمك ..

كلام منطقي بصراحة

بس هي قاسية اوي علينا .. الفقر وحش .. قلة القيمة وحشه .. الجوع وحش .. كسرة النفس وحشه .. قاسيه مش كده !!

بس لحظة يا جماعه احنا كده بنخلط الأوراق زي ما بيقولوا .. مين اللي قاسي بالضبط !!

مصر !!

لا والله ..

البلد دي كلها خير وطيبه .. كل ما ابص في وشوش الناس اللي ماشيين ف الشارع وانا رايحه الكليه الصبح باقعد اتخيل حكاية كل واحد فيهم .. ببص في عنين واحد شكله موظف حكومة وباحس انه فرحان عشان النهارده آخر الشهر والقبض على وشك .. فرحان بالـ400 جنيه اللي هياخدهم وبالنسباله دول حل كل همومه ..

بابص في عنين الفلاحة اللي شايله طشت الجبنة المتغطي وهي رايحه السوق عشان تبيع طول اليوم عشان 9 جنيه مكسب ولا حاجه..

اتنين بيتخانقوا مع بعض

بعد شوية يصالحوا بعض وولا أكنهم كانوا بيشتموا بعض من شوية ..

شعبنا طيب .. وبلدنا جميله ..

يمكن النظام قاسي علينا شويه ؟!!!
بس بلدنا ملهاش ذنب .. مصر دي غلبانه اوي والله .. عامله زي الست اللي ورثت من جوزها شيء وشويات وقام واحد اتجوزها وحرم ولادها الصغار من خير أبوهم ..

هتفضل برضو أمهم غلبانه ..

باغمض عيني وباحلم .. لو جه يوم ومشيت الحكومة دي وجت حكومة تانيه محترمه جدا وبتراعي ربنا فينا وبتنفذ شرعه .. وبقينا أغنيا وتعليمنا بقى زي أمريكا وبندرس اللي بنحبه وسوقنا رخيص ويوم ما افكر اتجوز اشتري التلاجه أم 4000 جنيه ام شاشه ديجيتال دي واشتري شقه في الحته اللي نفسي اسكن فيها و يبقى عندي عربيه حلوه وشوارع واسعه وجميله وأسره مطمنه على مستقبلها وابقى باقول اللي انا عايزاه للحكومة وهمه يسمعولي ويعملوا على حل مشاكلي ..

مصر يا جماعه تحققلنا كل ده .. بجد والله .. خير مصر يعيشنا أحسن من كده كمان ..

مش عارفه !! حاسه ان مشاعري داخله في بعضها .. أحب مصر ولا اكرهها ..

الغريب ان الحاجات اللي بتخنق الواحد وتاعباه بتتحول مع الوقت لمظاهر محببه للنفس !

زي الأوتوبيس .. والبشر اللي فيه .. والناس اللي بتوسع لبعضها والكومسري اللي بينادي قدام فاضي ياجماعه كواجب وطني والشاب الجدع اللي بيقوم للست العجوزه ويقولها اتفضلي يا حاجه .. والأجمل بقى الناس اللي بيمدولك إيدهم وانت بتجري ورا الاوتوبيس عشان تركب .. حاجات حلوه .. بتخلينا نبتسم بمراره على طريقة هم يضحك ..

الناس الطيبه اللي برغم الفقر وغلاء المعيشه بتقف تنكت في طابور العيش .. العيال اللي مزوغين من المدرسة في إيمان تام إن التعليم عملية غير مجديه وان المستقبل دي كلمة خرافية وان كل حاجه حاضر والماضي ده في الأغاني بس !

النفوس الطيبه برغم الغلاء .. النفوس الكريمه برغم الذل .. الناس الشقيانه عشان ملاليم .. أهالينا اللي بيشقوا عشان يشوفونا احسن منهم ..

العيون اللي بتجري ورا ابو تريكه في الشاشه لإنه بالنسبالهم البهجة الوحيده في حياتهم والحاجه الوحيده اللي بتحسسهم بكرامتهم وبحبهم لبلدهم ..

منظر الغروب على البحر والموج بيضرب في الصخر ويطير عالي وماينساناش من لفحة ميه أكنه بيقلنا انا بحركو انا حته منكم زي ماانتوا حته مني ..

منظر الصعايده بجلاليبهم وهمه ماشيين في عزة وفخر أكنهم كلهم عُمَد .. مولودين بحب الأرض والموت عشانها ..

منظر القناة الأولى وهي بتوش ومش فاهمه ايه البرنامج اللي شغال ده واذا كان اللي بيقدمه واحد ولا واحده وايميلهم اللي ع الياهو ..

منظر الأب اللي واخد عياله آخر الأسبوع بيفسحهم والفرحة ف عيونهم وبيتنططوا وبيلعبوا معاه كورة وهو برغم الهم اللي فوق دماغه كله بيلعب معاهم وأكنهم الحاجه الوحيده في الدنيا !

مصر حلوه عشان هي مصر ..

حكمها فرعون وكانت مصر ..

حكمها الرومان وكانت مصر ..

حكمها عمرو بن العاص وكانت برضو مصر ..

فهمت لاول مره في حياتي معنى ان مصر دي قلب كبير بيضمنا ..

مهما لفينا في الدنيا .. مالناش غير بلدنا تلمنا ..

مهما كانت قاسيه ..

ارق تحياتى..

~~سكيتر~~ · 25-01-2008, 01:44 AM

اولا باشكرك خالص ع موضوعك ده الجميل والمتميز بجد

موضوع هايل وعظيم بيتكلم عن مشكلة من اكبر المشاكل

وهى القومية .. وسؤال .. هوه احنا مابقناش نحب مصر زى زماان ولا ايه اللى حصل

من الحاجات اللى بتعجبنى اووى فى الكرة .. انها بالاحظها انها اكتر واحدة بتجمع المصريين

بجد وروحهم العظيمة وتشجيعهم ومنظرهم المبهر

موضوعك جميل جدا ... عجبنى اووى اسلوبك الجميل البسيط السهل
والامثلة اللى دللتى بيها نظرتك

لكى منى خالص تحيتى ع إبداعك .. وتطورك .. ومواضيعك الجميلة