babys_cuteness2 = حمدي 
يا حمدي بالراحة علينا شويا سيدي ( استر عليا الله يستر عليك ) 
ايه المانشيت الملون اللي انا شوفته ده خضني الله يعين ونجاوب على اسألتك. 1- اسمك - تاريخ ميلادك - جنسيتك - ديانتك - دراستك ومكانها - بلدك - فصيلة دمك - طولك - وزنك - لون بشرتك - لون شعرك - لبسك المفضل - اكلتلك المفضله - 24 ساعة فاليوم ازاي بتقضيهم ؟ اسمي اسلام، وتاريخ ميلادي هو 13/07/1987، الجنسية مصرية، والديانة مسلم والحمد لله، دراستي في كلية الحقوق - جامعة عين شمس، بلدي هي بورسعيد بالتحديد مدينة بورفؤاد، فصيلة دمي الله اعلم بصراحة، الطول في حدود حوالي 180 سم، ولو بشرتي قمحي، لون شعري اسود. اما عن لبسي المفضل فهو اللبس المريح او الفضفاض يعني تقدر تقول سبورت مش بحاول اقيد نفسي بحاجة معينة او رسمية زي اي شاب، واكلتي المفضلة فواكه البحر. يومي بقضيه وسط صحابي واهلي وطبعاً شوشو علطول جنبي ممكن نكون بنكلم بعض في اي وقت في اليوم. اذا في دراسة بكون في القاهرة في جامعتي وليا اصدقاء في الدراسة بحبهم جداً بس هما مش كتير بالمقارنة بوقتي بين الدراسة وحياتي عموماً فالاخيرة اكتر لان طابع كليتي نظري مش بتحتاج حضور كتير.
2- عندك 5 مراحل + مرحلة المستقبل
المرحله الأولي : قبل الدراسه
مرحلة طفولة عادية جداً مكنش فيها اي شئ غريب او ملفت للانتباه غير اني كنت كل شويا اقع واتعور على رجليا لاني كنت بحب الجري جداً، تقريباً رميت كتير حجات من البلكونة معالق وشوك تقريباً اي حاجة بتقع في ايدي، لعب بتتكسر طبعاً وغالباً العربيات لان الولاد على حسب ما افتكر كانوا بيحبوا العربيات ايامها. المرحله الثانيه : الابتدائيه ( على حسب ما تفتكر - احكلنا شويه عنها )
انا افتكر اني كنت مش بحب الرياضة خالص، والانجليزي كنت متقعد منه بسبب مدرسة الله يسامحها، كنت متفوق في العلوم واللغة العربية كنت بعشقها والدراسات كنت بحبها اوي، بدأت اروح اصطاد سمك مع والدي وعلمني الصيد وطبعاً كسبت من الموضوع ده صبر بشكل كبير اوي. كنت بحب الرسم جداً وخصوصاً المراكب، وفي الفترة دي علمت نفسي السباحة، وقريت قصص كتير اوي خصوصاً تان تان المرحله الثالثه: الاعداديه ( على حسب ما تفتكر - احلكنا شويه عنها )
اممممم المرحلة دي كانت متناقضة بين تفوق دراسي بعد ابتدائي استمر معايا لاعدادي،وبدأت اقرى اكتر، ولعبت رياضة العاب القوى في سنة اولى وتانية، ومع الاسف في سنة ثالثة اعدادي بدأت التدخين بدون ما حد يعرف بالرغم اني كنت في فصل المتفوقين ايامها، بدأت ادخل على الانترنت، وكنت برضو بصطاد سمك مع والدي، ودخلت ثانوية عامة بتفوق دراسي. المرحله الرابعه : المرحله الثانويه ( على حسب ما تفتكر - احكلنا شويه عنها )
لغاية سنة اولى ثانوي كنت بذاكر كويس وكنت في فصل المتفوقين برضو ومناهج اضافية وحوارات كتير، اصدقاء ثانوي كانوا بالنسبة محبوبين جداً، ودخلت تانية ثانوي قسم علمي علوم لاني كان نفسي ادخل كلية الصيدلة، لكن حصلت ظروف في البيت منعتني من المذاكرة فاتجهت للانترنت باندفاع وجيبت في ثانوي عام مرحلة اولى 80% بدون مذاكرة وحولت أدبي في ثالتة المهم اني خرجت من الموضوع ده ب 80% برضو ، ودخلت كلية حقوق جامعة عين شمس برغبتي ولله الحمد. - في فترة اجازة تالتة ثانوي أسسنا الموقع ده وكان اسمه Arab4music.com وبعدين اتغير بقا اسمه A4mu.com واستمرت المسيرة 
المرحله الخامسه : المرحله الجامعيه ( واللي انت موجود فيها حالياً فالفرقه الرابعه ليسانس حقوق وربنا يوفقك ان شاء الله - احكلنا شويه بقى عنها )
لما بتكلم عن المرحلة الجامعية انتقلت للقاهرة وفي شهر 11 ارتبطت بأغلى انسانة عندي في الدنيا ( بحبها اكتر من نفسي )، وزورت اسكندرية لاول مرة في حياتي كان في يوم 6/11/2004 واتكررت الزيارات اكتر من مرة، وكانت الاقامة ما بين القاهرة واسكندرية علطول قضيت في الفترة دي احلى ايام حياتي. اكتسبت صداقات كتير، وقربت من ناس كتير أثروا فيا واثرت فيهم، ونقدر نقول ان اقرب ناس ليا في الدنيا موجودين بالموقع هنا وبيشوفوا الكلام ده احباب واصدقاء ومعارف. المرحله القادمه ان شاء الله : مستقبلك ( احكلنا شويه عن مستقبلك القادم والناجح بإذن الله ودا اللي انا واثق منه )
المستقبل شئ غير مضمون، مجرد التفكير في بكرة مش عندي بس عند اي حد في ظل الظروف اللي احنا فيها دي حاجة مبهمة، ومش بنملك غير الايمان بالله اللي بيخلينا عايزين نستمر في حياتنا ونقدم شئ كويس. بالنسبة للشهادة الجامعية امل العمل فيها مش كبير، وفي الانترنت في كذا مجال للعمل، اما على مستوى التجارة والعمل الحر فالطريق مفتوح لأي انسان شرط المنافسة الشريفة. 3- طبعاً كل واحد عنده عائله واسرة وربنا يوفق الجميع ان شاء الله احكلنا شويه عن اسرتك وتعاملك معاهم والاسلوب وانت بتتعامل معاهم ازاي والسن وكدا كمان بالمره بما اني اصغر اخواتي دايماً التعامل في بداية حياتي كان فيه شئ من الرقابة ( اعمل كذا ومتعملش كذا ) لحد مرحلة المراهقة بيكون في احساس بنوع من الانطلاق والتجربة والمعرفة لاي شئ سواء كان كويس او وحش ، واوقات كتير كنت بحس بالمسئولية خصوصاً لما بكون موجود خارج بلدي. التعامل معاهم في نوع من الحساسية شويا خصوصاً الاخوات، عندي اخين اكبر مني وانا التالت، وعندي اخت اصغر مني. لكن الصراحة بحس كتير ان بيكون ليا تعامل من نوع خاص في البيت خصوصاً من ناحية الاكل لان في اكل كتير مش بحبوا، من ناحية المعاملة ممكن تكون بتختلف شويا كويس وشويا وحش. قالوا في الامثال " اللي سبق كل النبأ " لكن الحمد لله على كل حال. 
4- اسلام طبعاً كل واحد له مميزات وعيوب وكل واحد وله تفكير اشرح لنا بقى طريقة تفكيرك وايه الميزات اللي انت بتحبها فنفسك وايه العيوب اللي موجوده فيك وتحب ان تتجنبها ؟ خير الكلام ما قل ودل. بداية يا حمدي انا مش بعرف اكره اي انسان مهما عمل او غلط فيا، مبدأ الكره ده مش عندي من اساسه لكن برضو اكيد الانسان بياخد موقف من اللي ادامه بس مش بيرتقي لدرجة الكره، وبحب بجنون. دايماً التفكير بيكون تحليلي، لحد ما توصل لنتيجة معينة بطريقة علمية، ومش مهم الاسلوب يكون ازاي طالما هو مشروع لكن المهم النتيجة اللي المفروض ترضيك. الميزات اللي بحبها في نفسي اني لما بصمم على حاجة بوصلها ولو بعد حين، عندي كمية صبر غير طبيعية ولو اني سعات بحس اني متسرع، بثق في نفسي جداً وبقدر ابرر اي موقف اتحطيت فيه سواء كنت غلطان او على حق. في عيب بيضاقني اوي لما بنام مش بحب اصحى ولما بصحى مش بحب انام، يعني ممكن منامش فترة كبيرة، في حين اني ممكن انام ال 24 ساعة!!! 
لما بتحصل حاجة بتزعلني بحب اكتمها في نفسي، وبالرغم من اني مقتنع ان ده مش صح وان ده مؤلم جداً، بس شوشو خلتني اغير الفكرة دي من دماغي خالص. كمان صحابي اللي حواليا بثق فيهم جداً ولو مكنتش كده كنت اتجننت من زمان 5- الانترنت بالنسبالك شيء مو عادي بالمعنى انه السبب فنجاحك ودا اكيد والسبب في ارتباطك ودا معروف والسبب فمعرفتك بأغلب الاصدقاء - ياريت تحكلنا تاريخ الانترنت معاك ومع بعض الاشخاص اللي تحب تتكلم عنهم فيه وازاي اتعرفت عليهم ومن ضمنهم نصك التاني ( شوشو ) انا موافقك على كلامك طبعاً يا حمدي، هو فعلاً قربني من ناس كتير، بس مش معنى كده انه السبب في نجاحي والدليل على كده اني في كلية مالها علاقة بالانترنت، لكن هو اثر فيا بشكل كبير وخلاني اكسب حب وود ناس كتير حتى لو كانت المعرفة مش شخصية. انا استخدمت الانترنت من سنة 2000 تقريباً حوالي تانية او تالتة اعدادي، وكان احساس ان يكون في حد بيكلم حد بينك وبينه الاف الاميال شئ مش سهل !، واتطورت النشاطات على النت بين الدردشة وتصفح المواقع ومعرفة اخبار الدنيا، وسواء كان الانترنت كويس او وحش فانا مريت بيه وعرفت ايجابياته وسلبياته كويس. والحمد لله لما بتحتاج منه حاجة بجيبها. الانترنت كان من الاسباب اللي خلاني اتعرف على ناس كتير وارتبطت بيهم ارتباط لا يقبل التجزئة ( شوشو ). اتعرفت على ناس كتير واكتشفت اني ليا اخوات مش من نفس الام والاب ( بدون مجاملة ). حقيقي في ناس كتير كلمتهم على الانترنت ونفسي اشوفهم واقعد معاهم اوي. 6- طبعا كل واحد بيقضي يومه بطريقه مختلفه وعلى حسب ما متعود وعلى حسب ما هو عاش احكلنا شويه عن يومك ( الدراسي - العادي ) يومي الدراسي: هو قليل بس بيكون دراسي، حضور في الكلية ومحاضرات وسكاشن وورق ومذاكرة، كلام في الكلية، علاقات زمالة، رحلات وزيارات لاماكن، واستكشاف اماكن جديدة، وطبعاً جزء من الكلام ده حصل لان كليتي مش في بلدي. يومي العادي: مع شوشو ، او بين صحابي في نت كافيه او حتى في كافتيريا، او موجود على الكمبيوتر في البيت، او قاعد معاهم في البيت، وزيارات طبعاً للارحام. 7- اكتر وقت بتحس فيه انك زعلان اوي - اكتر وقت بتحس فيه انك مبسوط اوي - اكتر وقت بتحس انك محتاج تتكلم مع صحابك - اكتر وقت بتحب تقعد لوحدك - امتى حسيت انك بعيد عن ربنا - امتى حسيت انك بتعمل الغلط وانت مش راضي عنه - امتى حسيت انك قوي - امتى حسيت انك ضعيف ؟ - اكتر وقت بتحس فيه اني زعلان اوي لما بكون مزعل حد مني وبكون بحبه اوي ومقدرش على زعله، خصوصاً لما بيكون زعله خوف عليا. - اكتر وقت بحس فيه اني مبسوط اوي لما بكون مع شوشو او بكلمها ولما بحس انها مبسوطة وآخدة بالها من نفسها، ولما بكون مع صحابي اللي بحبهم، ولما بحس بالنجاح في اي مجال. - اكتر وقت بحس اني محتاج اتكلم مع صحابك لما نكون رايقيين، او لما نكون في مناسبة، او لما نكون في حد مقصر معانا والعكس، او لما بنكون قاعدين لوحدنا في مكان بعيد او حتى خارجين. - بحس اني بعيد عن ربنا لما بكون مقصر في فروضه والكلام ده بيمر بيه اي حد في سننا لكن اوقات كتير اوي بحس اني قريب منه. - مش بحب اعمل حاجة وانا مش راضي عنها، واي حاجة بعملها بكون متحمل مسئوليتها. - بحس اني قوي لما بنفذ اللي في بالي وبكون ناجح. - بحس اني ضعيف لما بكون قدام وضع مليش دخل فيه ومقدرش اغيره. 8- هوياتك المفضله سمسم - كان نفسك تدخل كليه ايه - هل انت راضي عن نفسك دلوقتي وليه ؟ - هوايتي المفضلة هي القراءة والصيد. - كان نفسي ادخل كلية صيدلة. - راضي عن نفسي الحمد لله، لاني ببساطة بحاول انجز المطلوب مني. 9 - مش عارف ليه حاسس فالفتره اللي جيه اني هكون معاك كتير وبقضي معاك ايام حلوه - هل دا كويس بالنسبالك ام حاسس ان هيكون في متاعب - على فكره سمسم انا مرتاح للايام دي من قبل ما اشفها بس سبحان الله كل شيء بإرادة ربنا بس حاسس بكدا وعيب عليا لو انا حسيت بحاجه ومقولتلكش ؟ لا مش عيب يا حمدي، بالعكس دي حاجة تفرحني وتشرفني، وده اكيد كويس بالنسبة لي رغم اني هبعد كتير ، انما في الاخر هيرضيني ويريحني.
10- السؤال دا مفتوح
اي حد يجي فبالك اتكلم عليه شويه سواء من داخل المنتدى او من خارج المنتدى فخلال عشر دقايق قبل الاجابه فكر شويه وشوف مين يجي فبالك وكام اسم واكتب عن كل واحد شويه . مفتوح اوي السؤال ده يا حمدي ياريت لو تحدده او حد يحدده في الاسئلة اللي جاية. وربنا يستر يا حمدي ولما اشوفك هوريك على الورطة اللي ورطهالي دي بس انا مبسوط اني كتبت الكلام ده كله ولو حد شايل مني في حاجة ياريت يسامحني.