حتفهم معنى العنوان قدام شويه على اليمين ^_^
بالمعنى الموضوع بيتكلم عن ايه
علشان اخوانا خرييجى معهد الأورام
فهو عن مشكله أصبحت فرز اول فى عقول بعض الناس
هى ايه المشكله؟
حتعرفوها قدام
نخش فى الموضوع
تعالوا نرجع بالذكريات شويه لورا
حنبتدى من اول ضمة حضن لأم كل واحد/ة فينا
اخدنا فيها
اجمل واحن حضن دافى بيطلع بدون مقابل
احساس بالأمان رغم عدم اكتمال التفكير وبناء العقل
شويه وروحنا الحضانه
أخدنا فيها
احسن دلع وحنيه من اجمل مس فى الدنيا
علمتنا نشخبط شخابيط
ونلون على الحيط
وقابلنا فيها ناس مش كنا عارفين انهم حيكونوا فى يوم من الأيام
اخواتنا واصدقائنا واصحاب عمرنا
نخش قدام شويه على الأبتدائيه
أخدنا فيها
ازاى نقرا وازاى نكتب
وحفظنا اصغر سور من القران الكريم
واتعلمنا فيها الحساب
بس مش علمتنا الحساب من غدر الدنيا
يمكن خوف وشفقه علينا من الصدمه
ويمكن جهل وتخلف وعدم وعى
فى مننا اللى اكتفى بالمرحله دى
واهله شغلوه علشان يزيد من الدخل ويخفف من العيبق اللى على العيله
المهم انه اشتغل
وفى اللى كمل معانا لمرحله الأعداديه
مرحله جديده علينا
أخدنا فيها
علوم جديده وبدات عقولنا تفكر وتحسب وتنظم وترتب
علمتنا معنى كلمه جديده علينا هى كلمه نشارك
ازاى نشارك بعض فى حاجه واحده
فى لعبه , فى جماعه كشافه مثلا , فى زياره صاحب لينا تعبان
وغاب عن المدرسه , فى زياره سور مدرسه البنات اللى جنبنا ^_*
اخدنا فيها كتير
ملحوظه:انا مش بشرح بالتفصيل كل مرحله
علشان الموضوع مايكونش طويل زياده عن اللازم
دخلنا على المرحله الثانويه
اخدنا فيها
فيزياء وكيمياء واحياء وعلم نفس و ....الخ
بجانب شرب السجاير ومعاكسه البنات والخناق ....الخ
نسينا فيها اصحابنا القدام
واتعرفنا على اصحاب جداد وفى فينا اللى طلع اصيل
وصان صاحبه وحافظ عليه وصاحبه كمان حافظ
على صداقتهم وصحبتهم
الكل حيفكر ان المرحله اللى جايه الكليه
لا طبعا
طب واحنا كنا فى اجازه الصيف بنعمل ايه
طب فى الحضانة وابتدائى واعدادى حنقول كنا بنلعب
اهو كنا عيال صغيره
انما فى ثانوى كمان نلعب
بالنسبه للولاد فى مننا اللى كان ابن امه
وقضاها فى الخروج والفسح والمصايف وكلام البنات ....الخ
وفى مننا اللى ابوه طلب مساعدته ليه فى محل تجارى او مشغل
او ورشه او شركه او مصنع ...الخ
وكان الواحد مننا نازل وهو منفوخ من ابوه ومش طايق نفسه
بس اهو ابوه مهما كان حيوديه فين يعنى
بالنسبه للبنات
طبعا مقضينها فى البيت
ونادر جدا لما تلاقى حد منهم استثمر وقت الاجازه فى المرحله دى
خلصت الأجازه ودخلنا الكليه
اخدنا فيها
طعم جديد من التفكير
اتعلمنا ازاى نبنى علاقه مع البنات ونخدعهم بكلامنا المعسول
وازاى نهدم علاقه مع اصحابنا اللى اكلنا معاهم العيش والملح
عرفنا فيها ازاى نعزم الزوزا بتاعتنا على برجر وهوت ميكسكانو من ابو 4 جنيه
ويبقى الواحد من ده واخد مصروفه 5 جنيه ويوفر الجنيه علشان يجيبلها هديه
فى عيد الحب
اتعلمنا فيها الغدر والخيانه والضرب فى الظهر بس للأسف مش من الدكاتره
لا من اصحابنا وللأسف بردوا كنا تلامذه خايبين بالنسبه ليهم
فى مننا اللى تفكيره تدنى ودخل فى حوار مخدرات وكيمياء وديفيلست ... الخ
وفى مننا اللى ارتقى بتفكيره وقعد مع نفسه قعده عرب وبدأ يحسبها
وحسبها فعلا وقضى الكليه دراسه وعلم
فى لحظه لقينا نفسنا فى الاجازه
بالرغم من ان سنين الكليه كلها بالنسبالنا اجازه
الولاد فى منهم اللى عقل وبدأ يفكر ويعتمد على نفسه
وحاول يشتغل اى شغلانه او يتعلم اى صنعه ولو من باب قتل الوقت
بس المهم انه يحس بطعم كل جنيه يكسبه من عرق جبينه
وفى مننا اللى ماكانش بينزل من على حجر امه
فلوس وفسح وخروج ودلع وشقق مفروشه ....الخ
اما بالنسبه للبنات
فى منهم اللى فكرت انها تشتغل ولو حتى تشتغل نفسها
بس اسمها اشتغلت وخلاص
او حتى قعدت فى البيت ساعدت امها فى اكله تسد النفس من ايديها
او ساعدت فى ارتفاع ضغط ابوها بسبب زياده سعر فاتوره التليفون
وفى منهم اللى كانت بتصحى العصر على علبه المكياج
ومانيكير وباضيكير وميك اب ومرايه ومعاد فى الكوافير مسيو ميلاد عنده
لون صبغه جديد لسه جايه انما ايه
ولبست وحجزت اعلى رصيف قدام السراج مول ولا فى زتونه
خلصت الكليه
وراحت ايامها
فى مننا اللى لسه بيدرس
طب بيدرس ايه ده يا عم
بيعمل ماجيستير او بيحضر رساله دكتوراه او بيحضر عفريت حتى
بياخد فى كورسات المهم
خلص من هنا
وشاف جيشه ايه ظروفه ليه جيش ولا عنده عوزرو
وفى اللى ربنا صلحله حاله واتجوز واتهد وتاب عليه المولى
طب والناس اللى كليتها كانت سنتين ولا اربعه راحوا فين الناس دى
موجودين يا عم هما والبنات
بس الولاد فى منهم اللى اشتغل وطبعا واكيد وحتما شغلانه بعيد عن مجال دراسته
والباقى طبعا مرصوصين فى صفوف متوازيه على القهاوى
اما البنات بقى
اللى ربنا كرمها زى ما كرم السادات واتجوزت وشافتلها واحد تشل انفاس امه
واللى لسه قاعده مش لاقيه حاجه تعملها ومستنيه ابن الحرام يجيلها
واهى بالمره بتدور على شغلانه سكرتيره فى شركه
اصلها لسه جايبه مينى جيب ونفسها تجربها
نخش على المرحله الاخير
مرحله ايه ياعم
مابقاش فى مراحل خلاص
ما احنا اخدنا حاجات كتير
من صغرنا واحنا متعودين اننا
لازم ناخد فيها
فجاه كده مش نلاقى حاجه ناخد فيها
شور الكل قال دلوقتى
الراجل ده فاكر دمه خفيف وبيشتغلنا
لا والله
انت لو مخك نظيف شويه وبتشغله
كنت عرفت من اول سطرين إن
موضوعى بيتكلم عن حاجه اسمها
الـبطـــــــالـه
انواعها كتيييييييير
ومش حتكلم عن انواعها بالتفصيل
يكفينا نعرف إنها
وباء انتشر بين الشعوب
واللى ساعد فى خلق وانتشار الداء ده
هى الحكومه
بس نشرت الداء
ومش صنعت الدواء
عملنا حاجات كتير على رائ الفنان
علاء عنتر
مش حرمنا نفسنا من حاجه
فى مننا اللى عمل حاجات كتير صح واتعلم جنبها حاجات كتير غلط
وفى مننا اللى عمل حاجات كتير غلط واتعلم برضو حاجات كتير صح
طول عمرنا متعودين ناخد
جه الوقت اللى ندى فيه
بس ندى بمصلحه للطرفين
عاوزين نشتغل
عاوزين نعمل لنفسنا كرامه
حتقولى هو الواحد يبقى مش عنده كرامه إلا لو اشتغل
اقولك اه
عاوزين نتجوز بنت حلال ويكون لينا بيت ونشيل مسؤوليه
عاوزين نعيش حياه نظيفه
عاوزين نتقرب من ربنا بدون سبب
مش نصلى ونصوم ونذكى علشان يجيلنا شغل
ولما نشتغل ننسى حاجه اسمها عباده
لا انا اشتغل واقوله انا جايلك مش علشان حاجه
ولو مش اشتغلت برضو اروحله
مش حلاقى عند حد غيره حل لكل مشاكلى
عاوزين ندوق طعم القرش اللى جاى بطلعان
عين ام اللى خلفونا
عاوزين...
عاوزين...
عاوزين...
عارفين احنا دلوقتى زى مين
زى الطفل الصغير اللى لسه بيرضع
وامه عودته على البزازه او السهايه او اللهايه
وفجأه كده تيجى تسحبها منه
يالهووووووووووووى
خد عندك بقى
- ياستى سكتى الواد ده
- طب اعمله ايه انااا بلاش افطمه يعنى
- يعنى مش حعرف انام شويه قبل لما اروح الشغل
- يعنى عاجبك شكله وهو عنده 4 سنين ولسه الزفتته دى فى بقه
- انا سايبلك الأوضه كلها وطالع
- اه ما ده اللى انت ناصح فيه مشيلنى الهم كلهه
- لكلكى فى الكلام كتير خليها ليله طين على دمماغك ودماغه
- ده اللى انت شاطر فيه ادينى ساكته
طبعا قلب الام يحن على طفلها
تقوم تديهاله شويه وتسحبها منه شويه
مع زياده فتره وجودها خارج فم الطفل فى كل مره ^_^
بس اسمها حنت عليه
قلبها رق وحست ان ده حته من جسمها
احنا بقى الطفل
وامنا بقى
حكومتنا
بس دى ام تانيه خالص
ام مختلفه تماما
امنا الغوله
ام من قريش او من يهود خيبر
من الأربعين حرامى بتوع على بابا
ويمكن تكون الأربعين كلهم بالتشكيل الوزارى الجديد
علمتنا من صغرنا اننا
لازم ناخد فيها
وفجاه بطلت تدينا فيها
عمركوا وانتوا ماشيين فى شارع فى حاره شعبيه
فى منطقه سكنيه او حتى راكبين مواصله ايأ كان ايه هى
عمركوا ما صادفكوا وسمعتوا واحد بيشتم فى الحكومه
اكيد حصل
طبعا كل واحد وواحده مننا حيسمعه من هنا
وحيقولك شوف الراجل قليل الأدب
ده واحد مهزق ومش متربى وى وى ...
طب ليه مش حد فينا سال نفسه هو الراجل ده بيشتم ليه فى الحكومه
هل ممكن يكون مجنون
حنعتبر انه مجنون واختيار الحكومه بالزات كانت صدفه ليه
بس هل تعتقد ان اللى بيشتمها حتسيبه عايش فى البلد الفتره دى كلها
طبيعى حتاخده على عش المجانين
بس مش شفقه منها علشان تعالجه هناك
لالالالا
علشان لو مات ماحدش يسمع عنه حاجه
طب حنقول انه عاقل
طب كلنا نعرف ان لكل فعل رد فعل
طب رد فعل الراجل ده كانت الشتيمه والأهانه فى الحكومه
طب الحكومه اساسا عملت فيه ايه علشان يلعن ويسب فيها
شوووور كلنا حنطلع الراجل هو اللى غلطان
حتى لا اكثر من الأطاله عليكوا بموضوعى
لى سؤال اخير قبل كتابه اخر سطور موضوعى
وارجوا من جميع من يشاهد التوبيك
انه يجاوب عليه
هل نقدر نكمل حياتنا من غير ما ناخد فيها ؟
( طبعا مافيش حد حيجاوب على السؤال ده غير اللى قرى وفهم الموضوع )
اه نســيـــت
فى نوع من انواع البطاله حتقابلوه دلوقتى فى موضوعى ده
عارفين ايه هو
لما تلاقى عدد مشاهدات موضوعى ده فى اول يوم تتعدى الـ 30 مشاهده
(علشان الكل حيشوفه ويقولك اكيد صلاح عامله مصيبه)
وعدد الردود لا تتعدى الخمسه
( والخمسه اللى حيردوا من شلتى )
^_________*
بيقولك الأيد البطاله نجسه
ده لو المخ شغال وهى مش قادره تكتب
انما لما يكون المخ شغال
والأيد شغاله
وكله شغال
والمانع يكون الخوف
لا تعليق
سورى طوولت عليكوا قوى