منتديات عرب للجميع - عرض مشاركة واحدة - الضيف الثاني

**Shoshou** · 21-02-2008, 10:56 PM

اقتباس:

يا حلاوه يا ولاد

ايه الحلاوه والجمال ده

شوشو على الكرسى

ده انا لازم اسألك واعصرك

ده انت حبيبت قلبى وعشره سنين

هو انا اقدر افوت الفرصه ده

عيييييييييييييييييييييب

رونى

يهون عليكي العيش والماكدونالدز اللى بينا ؟

مش اسلوب ابدا..

اقتباس:

ما علينا هاتى كابنشينو واقعدى علشان تركزى

تصدقى والله عملت مج النسكافيه اهو وجيت عشان اجاوبلك بمزاااج

ايه رأيك فى ضيف فى ورطه؟ وما هو شعورك وانتى فى الموقف ده؟

كفكره هى مش جديده..

وكان نفسى نعملها من زمان.. بس كانت اكتر حاجه موقفانى عن تنفيذها انى كان نفسى حد يتولاها.. ويكون هو المذيع..

ف لما سكيتر اقترح الفكره ف البدايه.. دبسناه فيها بقى بالمره

بالنسبه حضرتك للشعور اللى محدش مقدره خالص

حاسه انى اتزنقت يا اوختشى

لالا بجد فعلا هو الموضوع مش صعب بالنسبالى لأنى فعلا اللى بييجي على بالى بكتبه على طول.. مش بفكر كتير.. ف مش حاسه بأى مشكله.. ولحد دلوقتى حتى مقابلنيش سؤال دايقنى او خلانى افكر فتره طويله قبل ما اجاوبه..

كل انسان وله أمنيات وأمال .. يا ريت تقوليلنا عن الحلم او الأمنية اللي تتمنيها ... ؟

زيي زى اى حد.. امنيتي الاولى ان ربنا يكون راضى عنى.. بعد كده نفسى اكون ناجحه ف حياتى.. عموما مع الناس علاقتى تكون كويسه.. اخلص دراستى ونتجوز انا والانسان اللى بحبه.. اكون اسره كويسه وابقى زوجه وام ناجحه.. لو اشتغلت اكون متميزه ف حاجه معينه.. وحاجات كتير اوى بجد بس هى دى عموما الامنيات اللى بفكر فيها دلوقتى.. لكن نتيجه مرور الوقت واختلاف الظروف الامنيات بتختلف برضو..

أصعب المواقف اللي مريتى بها؟ وقوليلنا موقف طريف

بصى من اصعب المواقف اللى ممكن امر بيها هى لما اتصدم ف حد.. او اكون راسمه صوره لحد ف خيالى والاقى الحقيقه حاجه تانيه خالص..

من اصعب المواقف برضو انى احس انى بتظلم او حد فاهمنى غلط وانا مش قادره اتكلم او اعبر عن اللى جوايا..

بالنسبه لحكايه الموقف الطريف دى ف كل يوم الواحد بيتعرض لحاجات كتير اوى.. بس عموما والله مش فاكره اوى حاجه دلوقتى..

-فأي قرار تتخذهه هل ..... تحكمى عقلك أم قلبك فيه ... ؟؟ ومن الأسبق فالتحكيم قلبك أم عقلك ؟؟؟؟؟؟؟؟

ده بيتوقف على طبيعه الموقف..

فيه مواقف قرارتى لازم تكون من عقلى بس.. ومواقف تانيه من قلبى بس.. ومواقف م الاتنين

ده بالنسبه للكلام اللى نفسى انفذه فعلا..

لكن اللى بيغلب عليا دايما تحكيم قلبى مش عقلى..

هل ندمت فحياتك على شي معيّــن ؟؟؟

اكيد

مالفـرق بين الحب والصداقة ؟ وهل يمكن ان يسلكا طرق الغيرة ؟

فرق كبييييييير

الحب ده علاقه من نوع خاااص فعلا..

يعنى احاسيس الاصدقاء بتختلف كتير عن احاسيس اتنين بيحبوا بعض..

وغالباً احاسيس الحب بتكون متداخله ومعقده اكتر..

بالنسبه للغيره ، ف الحب اساسى فيه الغيره.. دى حاجه لا اراديه..

انما بالنسبه للصداقه ، ف الغيره دى بتكون احتمال وارد.. مش اساسيه..

وما هي المجالات التي تتمنى ان تأخذيها منهاجا في حياتك ؟؟

والله يا رونى انا م الناس اللى مش بحب اخد مجال او منهج معين واحصر نفسى فيه..

يعنى ممكن منهجى ف الحياه يكون مبنى على مليووون مجال.. وكل يوم المجالات دى تتغير.. واتعلم حاجه جديده.. مش هحصر نفسى ف حاجه..

ماهي اجمل اللحظات في حياتك ؟

لما اكون جنب الناس اللى بحبها

مامعنى كلمة الخيانه في نطرك؟ وهل مررت بتجربه نهايتها خيانه ؟

الخيانه اكيد من اصعب الحاجات اللى الانسان ممكن يمر بيها.. احساس مظنش انى هعرف اوصفه بكلام بس كل اللى ممكن اقوله ان الانسان اللى بيخون ميستحقش ثقه ولا حب ولا صداقه ولا اى علاقات انسانيه من اصله..

وبصراحه انا مجربتش الخيانه اوى يعنى.. بس يمكن جربت كتير ان حد يكدب عليا.. او يحور كلام محصلش.. او يكون منافق.. واهى مناظر بنشوفها كتير.. وكل ده ف نظرى خيانه..

هتعملى ايه لو لقيتى واحد غبى قدامك ولازم تتعاملى معاه

يا رونى انا بتعامل مع الاشكال دى كل يوم

انا فعلا بتعرض كتير انى اتعامل مع ناس اغبيه فوق ما تتخيلي

طب انا هحكيلك على موقف ف السريع كده

الترم الاول كان عندى امتحان اقتصاد.. وانا بحب الماده دى وكنت كويسه فيها.. ف واحده صحبتى طلبت منى اشرحلها المضمون كده عشان تعرف تزاكرها لأنها مكانتش فاهمه حاجه ف الماده دى خالص

المهم اخدتها وقعدنا وشرحت ، وبراحه ، وورقه ، وقلم ، ورسومات ، وامثله.......... وليالى يا رونى

ودى تبصلى ونظره اندهاش فظيعه على وشها شبه دى كده --->

اقولها يا بنتى فاهمه ؟

مفيش غير نفس النظره الغبيه

طب معلش عشان خاطرى قوليلي بس انتى فاهمه اللى انا بقوله ؟

مفيش اى رد فعل.. ومفيش اى ملامح على وشها غير نظره الغباء دى..

انا حسيت ضغطى على منها.. ومع ذلك طولت باااالى وشرحت براحه تانى وتالت ورابع

لحد ما حسيت ان العيب منى..

بس والله شرحت لناس تانيه وفهموا ف دقيقه.. بس اهو ده اللى اسمه الغباء بقى..

سيبك م الرغى ده كله.. اللى عايزه اوصلهولك يعنى انى بطول بالى على اد ما اقدر.. بحاول اكون صبوره

ما هي احلى كلمة قيلت لك ؟؟؟

حاجات كتير يا رونى بحس انى مبسوطه لما اسمعها.. واى كلمه كويسه ف حقى بتفرحنى اكيد..

اعطني صبراً اجالد به صخر ماهو الموقف الذي كنت تحتاج الى صبر فيه؟؟

اى موقف بتعرض للعصبيه فيه

عشان لما بتعصب بقول كلام من غير تفكير.. ف يمكن هو ده اللى بحتاج فيه صبر وتفكير اكتر..

ايه الحاجه اللى بتخلى شوشو فرحانه؟

انى احس ان محدش شايل منى.. او احس ان الناس اللى بحبها فرحانه

ايه المكان اللى بتحسى بيه انك مرتاحه؟

بيتي

ايه الكلمه اللى بتردديها دائما؟

مش عارفه والله يا رونى حاجه معينه

مش بركز مع نفسى اوى بس اللى اقدر اقولهولك انى اوقات كتير بلاقى نفسى بتكلم مع حد واقوله : "بلاش كدب بس"

للاسف عندى حكايه الشك دى زياده شويه.. عشان دايما مش بصدق الكلام اللى بسمعه.. لازم اشوف بعيني

كلمه سمعتيها ودايما على بالك ولا تقدرى ان تنسيها؟

معلش خلى الكلمه دى ليا انا

ايه المكان اللى مش يبتحبى تروحيله بس لازم تروحى وبتكونى مغصوبه فيه؟

انا عموما مش بحب جو القاهره وبيوترنى

مش بحب اسيب اسكندريه خالص

بس عشان اهلى وقرايبي كلهم ف القاهره بنضطر نروح ف الاجازات.. او ف المناسبات.. ف طبعا بروح وانا نفسى الكام يوم يعدوا بسرعه عشان ارجع بيتنا..

_ما رأيك وتعريفك بهذه الكلمات ..
الخيانة .. من اعصب الاحاسيس اللى ممكن تتوصف
المرأه.. بسيطه والله بس للى يحاول يفهمها.. واللى يقول انه فهم واحده 100% يبقى لسه مش فاهم اى حاجه

الصداقة .. زى الحب بالنسبه للانسان.. لا غنى عنها
النميمة .. صفه بشعه وللاسف موجوده ف ناس كتير وخصوصا البنات..
النفاق .. شبه الخيانه شويه.. واهو كله كدب.. بس بكرهه كره العمى
العاقل هو اللى يوزن الامور قبل ما يعمل اى حاجه
المتكبر زى ما هيشوف الناس صغيرين.. اكيد هما كمان هيشوفوه صغير
المتواضع هو الكسبان لان من تواضع لله رفعه
المجنون هو اللى يعتقد انه فاهم ف كل حاجه
الحب زى الميه والهوا.. لا غنى عنه
الرومانسيه احساس جميل بجد بس مش اى حد بيقدره
الجمال مسأله نسبيه بس المهم كل واحد شايف ايه
رقة المشاعر غالباً بتستغل غلط.. ف عشان كده مش اى حد يستاهلها

نصيحه من اي شخص تعتبرها منهج في حياتك الى هذه اللحظه؟

هى مش نصيحه اوى بس بابا عودنى ان الثقه ف الناس بسهوله هتضرنى انا ف الاخر.. وفعلا.. مع الوقت اكتشفت ان كلامه صح

بس كل المشكله ان الموضوع زاد اوى معايا.. وبقيت ناااااااادرا اوى لما اثق ف حد يدرجه اوقات بتخنقنى

اقتباس:

ايه الاسأله الغريبه اللى انا سألتهالك دى هههههههه

إسألى نفسك يا هانم

اقتباس:

كفايه كده عليكى زمان الكابتشينو خلص

روحى اعملى اى حاجه تانيه تشربيها لحد ما اجيبلك اسأله تانى

للحديث بقيه

خلص من بدرى يا رونى والله..

وميرسي ع الاسئله الجامد دى.. وكفايه شماته بقى واعرفى ان ليكي يوم.. كما تدين تدااان والله

وعموما منتظره وجودك تانى سواء باسئله او لأ..

ارق تحياتى..