Shoshou

مش هتتخيلي والله انا فرحانه اد ايه بكلامك ده
سواء من كلامك العسول اللى قولتيه ف الاول ده
ولا من انى سبب من اسباب مشاركاتك معانا

اقتباس:

المهم دلعتك كتير ندخل بقى فى الجد.

براحه عشان بخاف :sad:
تقوليش هاخد حقنه مثلا





أولا : بما أنك أخر العنقود اكيد مدلعه شويه ولا كتير؟؟ وبالنسبه لان أخواتك كبار كتير عنك مين أكتر واحد أو واحده منهم قريب منك؟؟ وأزاى كنتى بتتعاملى معاهم لانك أصغر كتير؟

بصراحه كتييير مش شويه بس..
وحسب كلام اخواتى وكل الناس اللى يعرفونا من زمان.. انا اخده مميزات كتير اوى اخواتى مشافوهاش خالص..
بالنسبه لإخواتى للاسف هقوللك كده وانا حزينه.. بس بجد مفيش حد منهم قريب منى..
كلهم كبااار اوى والفرق بيني وبينهم شاااسع
يمكن من حوالى سنه كده اختى اللى قبلى على طول ابتدت تقرب منى اوى..
لكن غير كده اخواتى كلهم بيعتبرونى شوشو بقى الصغنونه المدلعه وكده فاهمه قصدى ؟
مش اكتر..

ثانيا: مين أكتر شخص ممكن يقولك رايه فى اى حاجه خاصه بيكى بصراحه من غير ما تزعلى؟ وايه أكتر حاجه ممكن تفرحك وانتى متضايقه ؟

بصى اى حد ممكن اقبل رأيه فيا طالما كان ف حدود الادب وبطريقه متجرحنيش
لكن حد يقول رأيه بطريقه تدايقنى.. صدقيني هيكون ردى يدايقه اكتر

اكتر حاجه بتفرحنى وانا مدايقه هو وجود اسلام..


ثالثا: ايه اكتر حاجه نفسك تتغير فى المنتدى وايه هو التطور اللى عايزاه يحصل؟ وايه هو اكتر قسم بتحبى تكتبى فيه ؟ ومين اكتر الاعضاء اللى بتحبى تعلقى على مواضعهم؟

اكتر حاجه نفسى تتغير بصراحه عدد الردود..
انا بشوف عددالقراءات وبقارنه بالنسبه لعدد الردود بستغرب..
وبقارنه بالنسبه لعدد الاعضاء بستغرب اكتر واكتر..
احنا دلوقتى تقريبا داخلين فـ 40,000 عضو "بسم الله ما شاء الله يعنى"
يعنى متوقع ان عدد الردود يكون اعلى من كده بشويه

التطور اللى عيزاه يحصل بصراحه ف المشرفين..
عايزه نوصل للمرحله ان كل قسم عليه مشرف.. والاهم من كده انه يكون مشرف واعى لمسئولياته عشان كل ما المنتدى بيكبر.. كل ما بيحتاج اهتمام ووعى اكتر..

اكتر قسم بحب اكتب فيه والله مش حاجه معينه.. بس تقدرى تقولى القسم العام اللى بيشمل (الاسلامى - العام - النقاش الجاد....إلخ) والقسم الاجتماعى اللى بيشمل (الساده الرجال - عالم حواء....إلخ)
لان بيكون فيهم مجال للحوار كبير.. ودى حاجه انا بحبها
انما مثلا البرامج والفنى والموبايلات وكل ده ف انا بعتبر ردودى فيه تشجيعيه مش اكتر..:smile:

رابعا: لو جاتلك تزكرة سفر يعنى سياحه تحبى تسافرى اى بلد؟ وليه؟

احب اسافر فرنسا او ايطاليا
مش عارفه ليه بس من صورهم بحس انهم بلاد جامده اوى.. وان الوجود فيها متعه اكيد

خامسا : بما انك اسكندرنيه بتحبى اسكندريه ؟ وايه اكتر الاماكن اللى بتحبى تروحيها؟ ولو خارجه انتى وحبيبك تحبى يواديكى فين ؟ وياترى بتعرفى تعومى ولا؟

بحب اسكندريه ؟ انا مش بحب مكان ف حياتى قد ما بحب اسكندريه دى
بصراحه هو مفيش مكان معين انا بحب اروحه لسبب بسيط انى زهقت..
هى هى نفس الاماكن والخروجات.. بس عموما بحب حتت كتير ف سموحه.. وممكن سان ستيفانو برضو..واوقات كارفور وداون تاون.. واوقات اى كافيه م الكافيهات اللى ادام كارفور.. وطبعا بما انك اسكندرانيه ف انتى فاهمه انا بقول ف ايه
بس المكان الوحيد اللى مش بزهق منه البحر..

ولو خارجه انا وحبيبي احب يوديني اى حته والله المهم يكون معايا وخلاص

بعرف اعوم طبعاً.. آينعم كنت هغرق من سنتين تلاته كده
بس يُقال يعنى انى بعرف اعوم

سادسا وأخيرا: صورتك المستعاره ليه أخترتى الصوره دى بالذات وبتمثلك ايه ؟ حاسه انها شبهك؟ معلش سؤال غلس

اخترتها عشان شكلها عجبنى.. يمكن حسيت انها بتعبر عن حاجه فيا مش عارفه هى ايه بالظبط.. بس بحبها اوى ومش بحب اغيرها خالص.. بحس انها خلاص ارتبطت بيا
بالنسبه لإنها شبهى او لأ ف ممكن برضو
بس مش اوووى يعنى
والسؤال مش غلس خالص بالعكس..

بالعكس والله.. انتى دمك مش تقيل خااالص واسئلتك عجبتنى اوى..
ومستنيه وجودك تانى سواء بأسئله او لأ..
وجودك لوحده منور..

ارق تحياتى..

__________________