Shoshou

اولا يا احمد ميرسي بجد ع التقديم الجامد ده.. ولو انه كتير اوى عليا.. ومستاهلش كل الكلام الجميل اللى انت قولته ف الاول ده..
ده كبدايه
ثانيا بقى يا سكيتر.. عشان نتفق من اولها.. بطل تحريض الاعضاء عليا
كفايه عليا اسئلتك لانك شكلك ناوي على انتقام

عموما انا هبتدى اجاوب وربنا يستر..

بسم الله الرحمن الرحيم..
استعنا ع الشقا بالله


بطاقتك الشخصية كلها اسمك وسنك وتاريخ ميلادك وعنوانك وجنسيتك وديانتك؟؟



شروق
19 سنه تقريباً
4/4/1989
الاسكندريه
مصرية
مسلمه " الحمد لله "

معاكى اخوات ولا لا ولو معاكى يبقى كام وايه ترتيبك واسمائهم ؟؟

اه عندى
بالترتيب من الكبير للصغير :

علا - 37 سنه

عبد العزيز - 34 سنه

مروه - 30 سنه

وبعدين انا.. آخر العنقووود

مجال دراستك وبتحبيه ولا لا ؟؟

انا بدرس بزنس "اداره اعمال" فى الاكاديميه العربيه البحريه للعلوم والتكنولوجيا
وبصراحه بحبه المجال ده جداا وبحب كل حاجه بدرسها فيه.. ما عدا المحاسبه بصراحه
مش بحبها خالص

لونك واكلتك وشرابك وفيلمك وممثلك المفضل ؟؟

لونى : البينك او الروز يعنى بكل درجاته
اكلتى : الفراخ بكل انواعها برضو
فيلمي : مليش فيلم معين.. بس كل فتره كده تلاقي فيلم عاجبنى اوى وخلاص..
ممثلى : برضو مليش حد معين بس بحب احمد السقا واحمد حلمى ومنه شلبى ومنى زكى

اعز صديق وصديقة عندك ؟؟

صديق ولد ؟ معنديش بصراحه
بس فيه حد ف حياتى بيمثلى حاجات كتير اوى منها انى بعتبره صديقي برضو

اما بالنسبه لأعز صديقه ف هما 2 واحده اسمها "بدور" والتانيه اسمها "هبه"
ودول اعرفهم من حوالى 8 - 9 سنين
من ايام ما كنا ف ابتدائى.. وكل حاجه تقريبا بنعملها مع بعض.. اينعم الكليه بعدتنا شويه عن بعض.. بس ده ميمنعش انهم لسه اقرب ناس بنات ليا.. الانتيخ بتاعى يعنى

احلى اوقات بتقضيها مع مين ؟؟

بصراحه بتعتمد على الظروف برضو.. يعنى اوقات بتكون احلى اوقاتى مع ولاد اخواتى.. واوقات بتكون احلى اوقاتى مع اصحابى.. على حسب الحاله النفسيه يعنى.. انا مزاجى اعمل ايه..
لكن الحاجه الاكيده انى بجد لما بكون جنب حد بحبه اكيد بكون بقضى احلى اوقاتى

اكييد طبعا حبيتى .. متقوليش لا .. كام مرة ؟؟ وخرجتى بايه من حبك ده


لالا مش هقول لأ
عارفه ان الانكار مش هينفعنى
هى مره واحده اللى حبيت فيها
وخرجت بحاجات كتييير اوى يا احمد فعلا..
منها ان الاحترام والتفاهم اساس كبير اوى ف الحب
وان اى اتنين بيحبوا بعض لازم كل واحد فيهم يستحمل التانى وقت خنقته
والصراحه اسااااس لا غنى عنه ف اى علاقه
وانه احساس حلووو اوى لما تحس انك واثق ف اللى بتحبه ووقت ما تحب تتكلم براحتك اوووى هتتكلم مع اللى بتحبه لانك عارف انه هيفهمك صح عشان مفيش اى حسابات او حواجز بينكوا
يوووه حاجات كتير اوى اتغيرت فيا لما حبيت.. وحاجات كتير اوى اتعلمتها م التجربه دى


اختيارك هيكون ازاى لحبيبك ومواصفات فتى احلامك ؟

بصراحه انا مش لسه هختار
ولا حتى ف التجربه اللى انا فيها دى اخترت..
انا لقيت نفسى بحب وخلاص.. من غير ما افكر ولا اختار ولا احسب حسابات
الموضوع فعلا بييجي تلقائى جدا.. اتنين بيرتاحوا لبعض.. ويحسوا بتفاهم بينهم.. وكل طرف يتأقلم مع طباع الطرف التانى.. ويحاول يكون شخص احسن عشان يستاهل حب وثقه الطرف التانى.. وزى ما بيقولوا كده ف الافلام بيبقى فيه كيميا.. يا اما الكيميا دى هينتج عنها مركب ذو جوووده ممتازه "اللى هو الحب"
يا اما المعمل هيفرقع


من يسكن قلبك؟

LiMoO

هل تؤيدين الزواج العاطفي ام الزواج التقليدي ؟ ولماذا ؟

اكيد العاطفى
لكذا سبب
السبب الاول ان انا ضد فكره انى احب واحد لأنه لازم احبه.. لان هو ده اللى هتجوزه
بجد فكره مرفوووضه تماما بالنسبالى
انا مع فكره انى اتجوز حد لانى بحبه.. مش احب حد لاننا هنتجوز
يعنى م الاخر الحب وبعدين الجواز
مش الجواز وبعدين الحب ، يا ييجي يا ميجيش..
مجازفه بصراحه انا مضمنهاش
السبب التانى ان لما احب حد هكون بحبه عشان فيه تفاهم.. وفيه انجذاب.. وفيه ارتياح.. وفيه حاجات كتير اوووى
انما لما اتجوز واحد انا اصلا محستش بأى حاجه من ناحيته.. هيبقى اسمى بأقلم حياتى على طباعه وخلاص.. بغض النظر الطباع دى متوافقه معايا ولا لأ

ايهما اهم شهادتك الجامعيه أم الزواج ممن تحبين ؟

بص انا شايفه ان الشهاده الجامعيه حاجه
والجواز م الانسان اللى بحبه حاجه مستقله خاااالص
لسبب بسيط.. ف الظروف اللى احنا بنمر بيها دلوقتى.. صعب الانسان يكون مش معاه شهاده جامعيه.. حتى لو معروف ان البنت هتتجوز وهتقعد ف بيتها والكلام ده كله.. بس معلش برضو الواحد ميعرفش بكره مخبى ايه.. لكن عموما لو اضطريت فعلا اختار بينهم هختار الانسان اللى بحبه بـــس هيكون صعب عليا جدا انى اتخلى عن حاجه ف اهميه الشهاده..

هل من الممكن ان تتحول الصداقه الى حب ؟

ممكن اوى.. ومعظم علاقات الحب ف الاساس بتكون صداقه.. وشويه شويه الطرفين بيقربوا من بعض لحد ما توصل العلاقه لحب مش بس صداقه..

هل تعترفين بشيء اسمه الصداقه بين الرجل والمرأة ؟

نادراً.. لأن الصداقه بين الرجل والمرأه غالباً هتقلب بعلاقه اكبر من كده.. ف عشان العلاقه تستمر على اساس انها صداقه محتاجه تحفظات كتير واطار معين ف التعامل مينفعش تجاوزه..

هل كنت السبب في يوما من الايام ان تدمر حياة شخص سواء العمليه او الاجتماعيه او العاطفيه؟

ابدااا الحمد لله
انا ممكن ازعل من حد.. او ادايق من حد.. بس عمرى ما اقدر أأذى اى حد.. ولو حصل عمرى ما هسامح نفسى.. طب وليه وجع القلب م الاول ؟

من هو اكثر شخص تفكرين فيه؟

اكيد الانسان اللى بحبه

ما هو اقتراحك الذي تتمنى ان يحدث في هذا المنتدى ولم يحدث الى الان ؟

بصراحه مفيش حاجه معينه لانى ببساطه ادمن.. ف اكيد مش هخلى ف نفسى حاجه يعنى
وهى دى الكوسه بعينها

هل ملابس الشخص امامك تؤثر فيك لتأخذ عنه انطباع ؟؟

بصراحه ف حاجات معينه
يعنى مش هاخد فكرتى الكامله عن الشخص اللى ادامى بسبب لبسه.. اكيد لأ
بس هاخد بعض الافكار بسبب لبسه.. زى مثلا ذوقه.. فن تنسيق الالوان - اه والله انا بعتبر تنسيق اللبس ده فن - وحاجات كده تتعلق بالذوق يعنى.. لكن انى احكم على شخصيه حد من منظره ؟ لأ خالص

اذا احببت شخصا في الوقت الخطأ وفي المكان الخطأ فماذا تفعلين ؟؟

انسحب تماماً

حكمة تؤمنين بها جدا؟؟

افعل ما شئت ، فكما تدين تدان

عاده تفعلينها دائما تتمنى ان تتركيها ؟

هى مش عاده بالظبط.. بس حاجه بعملها غصب عنى.. وهى انى تعبيرات وشى دايما بتعبر عن اللى جوايا.. ودى حاجه مش حلوه لانى اوقات كتير ببقى عايزه اخبى اللى انا حاسه بيه.. بس بيبان برضو

ماهو اجمل اسم لولد واجمل اسم لبنت من وجهة نظرك؟

ولد : كريم - اسلام - عمر

بنت : مريم - جنا

فى سطور قليلة .. مين شوشو ؟؟


انسانه عاديه جدا زى اى بنت.. بحب اكون مبسوطه على اد ما اقدر طالما مش بضر حد.. مش بحب حد يزعل منى.. ولا بحب اخسر حد وبحب احافظ على علاقتى بالناس.. نفسى اكون ناجحه ف حاجات كتير واحاول ارضى ربنا وبابا وماما على اد ما اقدر.. للاسف اوقات بكون متشائمه.. واوقات تانيه بلاقى نفسى قمه ف التفاؤل..
اممم.. وانت اعرف الباقى بقى م الاجابات



......... فقرة الاعضاء ........

إيه رايك فى الاعضاء دول بصراحة ؟؟
و ماذا تقولين لكل من .....؟؟ الاتنين








ليمووو : ليمو ده عايز موضوع لوحده عشان اقول رأيي فيه.. بس بإختصار.. اقرب حد ليا ف الدنيا - دماغه عاليه جدا - مثقف - دمه خفيـــف موووت - شخصيته قويه - طيب اوى - وسهــــــن

اقوله : ربنا ميحرمنيش منك


مايسترو : طيب جدا - كتير م الاوقات بيهزر ويضحك "ودى حاجه حلوه جدا" - اوقات بيكون متمسك برأيه اوى -مظبطنا اغانى اول بأول

اقوله : انا زي الفريك مليش شريك "فاهمنى طبعا"


حمدى : متدين - واثق ف نفسه لدرجه اوقات بستغربلها - رومانسى اوى

اقوله : ربنا يوفقك مع خطيبتك يااارب ومستنيه دعوه الفرح


سوسو : دى بقى من اطيب الناس اللى موجودين هنا - تلقائيه - خجوله - بتعرف تمسك اعصابها

اقولها : بلاش الطيبه مع البنات يا ميس سموووحه.. دول بنات عايزه قطع رقبتها


BaK! bAkI : معرفش ارتحتلها ليه من اول مشاركاتها - مثقفه ومتكلمه - وبحس انها رومانسيه

اقولها : متحرميناش من وجودك


amato_allah : عسوله خالص - برضو طيبه جدا - مميزه بطريقه كلامها ولكنتها المغربيه

اقولها : شدى حيلك ف دراستك بس متخليهاش تاخدك مننا


مشمشة : عضوه جديده لكن اثبتت وجودها ف وقت قليل - آراءها جميله - دماغها شغاله

اقولها : نورتى المنتدى بوجودك.. وبالتوفيق ان شاء الله..


نورسين : لذيذه وبرضو اثبتت وجودها ف وقت قصير - مثقفه - ردودها جميله

اقولها : متحرميناش من آراءك


SweeT AngeL : دماااغ رايقه جدا - معتدله جدا ف آراءها واسلوبها - دمها خفيف

اقولها : بطلى دلع بقى وركزى معانا شويه


Ni9ht : آراءه غالباً مختلفه - بحب اتشاكل معاه - وكفايه انه اسكندرانى يعنى اجدع ناس

اقوله : نشاطك الايام دى ملحوظ ومنور المنتدى.. يارب تفضل منوره على طول ومتغيبش علينا تانى.. وبطل شكل معايا


Rashad : برضو م الناس اللى لاحظت انهم متمسكين برأيهم بس مع ذلك ليه آراء كتير بتعجبنى - مواضيعه حلوه وبيكون عليها اقبال

اقوله : نفسى اشوفك بالنشاط اللى ابتديت بيه


lolofree : متابع على طول - بيحب الضحك والروقان - ومظبطنا رنات اول بأول

اقوله : ميرسي بجد لمجهودك ف المنتدى.. ويارب على طول


Devoted : كان من انشط الاعضاء ف وقت م الاوقات - دمه خفيف - اجتماعى

اقوله : نفسى ترجع تانى زى الاول.. ومتغيبش علينا كتير كده


ميدو : عضو نشيط جدا - نفسى ردوده يكون فيها الآراء بتغلب ع الشكر - اثبت وجوده ف وقت قصير

اقوله : استمر ف نشاطك وحاول تخترع جديد ف قسمك.


تيتو : عضو نشيط - محتاج يتنشر اكتر ف الاقسام - وبرضو محتاج آراءه تغلب ع الشكر ف ردوده

اقوله : حاول تنوع ف مواضيعك وتنتشر اكتر عن البرامج والصور..


عبدو : اكيد خبرته ف الحياه بتغلب على ردوده بحكم سنه - سريع البديهه - ردوده حاضره

اقوله : نورتنا بوجودك معانا.. وبرضو مستنيه اشوف اسمك ف اقسام كتير


رئيس التحرير : مثقف - متدين معتدل - آراءه بتعجبنى غالباً - للاسف غايب عننا :sad:

اقوله : افتقدنا وجودك معانا.. وان شاء الله ظروفك تخلص وترجعلنا بألف سلامه


mohameddessouki :مثقف - متكلم - ذكى - مواضيعه هادفه جدا - ردوده حاضره وبتعجبنى اوى

اقوله : ايه الغيبه دى ؟ افتقدنا وجودك فعلا.. :sad:


الاخبار الرياضية : ده مش شخص على فكره


كاريمان : طبعا كانت عضوه نشيطه جدااا وكانت متميزه بحضورها بس للاسف انقطعت عن المنتدى بعد ما اتقفل لفتره..

اقولها : نفسى نشوفك معانا تانى انتى وكل الاعضاء القدام الىل انقعوا بعد ما المنتدى اتقفل..


‏soosoos : نشيط ف قسمه جدا - ملوش انتشار ف اى اقسام تانيه

اقوله : نفسى نشوف اسمك ف اقسام تانيه غير قسمك..


وردة فلسطين : عضوه جميله نورتنا بوجودها - آراءها حلوه - شاعره متميزه

اقولها : نورتي المنتدى بوجودك.. ويارب تفضلى منورانا على طول


عاشق الانثى : عضو نشيط ومواضيعه جميله - المرأه ف نظره حاجه قيمه اوى - واثق ف نفسه

اقوله : استمر ف نشاطك.. ويارب مترحمناش من جديدك..


lizmo : عضو رائع ف ردوده - ديما ردوده بتزود من قيمه الموضوع - مثقف جدا

اقوله : وجودك مؤثر ف المنتدى.. متحرمناش منه


romida : عضوه نشيطه بس ف كتالوج المرأه - زوقها بيعجبنى ف اختياراتها

اقولها : نفسى اشوف اراءك ف مواضيع المنتدى اكتر من كده


سكيتر : بسيط - صريح - متفائل - دبلوماسى الى حد كبير

اقوله : انا بصراحه بشكر الصدفه اللى جابتك المنتدى هنا.. وخف عليا والنبى

وميرسي يا احمد كمان مره للمقدمه الجميله وللاسئله الجامده دى..


ارق تحياتى..