10-02-2008, 04:34 AM
|
| |
إنت مصري؟ جتك الأرف.... طيب ليه كدة؟؟؟ 
السلام عليكم ورحمة الله وبركاته
ازيكم يا آل مصرية ؟؟
عاملين ايه من البرد الحلو دا ؟؟؟
انا لفتت نظري رسالة جت عالميل كدا مفادها الآتي :
عشان انت مصرى
عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف
ايه اللي الناس بتبعته دا ؟؟؟
هوا المصري نزل وضعه ومكانه فمجتمعه للدرجة دي ؟؟
هل فعلا المواطن المصري حياته كده ؟؟
وهل نسبة الواقعية في الكلام دا تصل الى درجة
الجمع على المصريين كلهم ؟؟؟
ولا احنا ممكن نعلي صوتنا ونقول
" قلة قليلة "
او حتى .......
" البعض "
فكرت اني اطرح الفكرة والاقي ناس ممكن
تفكر بتفاؤل
و.........
تنظر نظرة ايجابية من زاوية مختلفة المرة دي
" للمجتمع "
على انه ......
" متحضر وافتخر بيه "
وافتخر بإني ......
" مصري "
؟؟؟؟؟؟
|