موضوع بجد حلو أوى للنقاش
بس فعلا زى ما أنت قلت المواصفات دى نسبيه من شخص لشخص
يعنى مثلا أنا بالنسبه لى فى حاجات مش ممكن اتنازل عنها فى الشخص اللى حرتبط بيه
وممكن نفس الحاجات دى ما تكونش فارقه مع واحده تانيه
انا حتكلم عن نفسى :-
أهم حاجه بالنسبه لى هى الاخلاق والدين والمبادىء ويكون شايل هم بلده ووطنه
مش معنى كده انى عايزاه ملاك لا طبعا . بس يعنى تكون اخلاقه ودينه مقبولين بالنسبه لى
ويجى وراهم على طول او معاهم الشكل يكون مقبول مش شرط انه جميل جدا بس شكل يرضينى
ويكون مستوى تعليمه متقارب مع تعليمى. وأسرته يكون مستواها الاجتماعى متقارب مع اسرتى. أنا قلت اجتماعى مش مادى؟؟
وعلى فكره مش مهم خالص بالنسبه لى المستوى المادى.
لأنى لو حبيته واقتنعت بيه حبدأ معاه من الصفر وممكن من تحت الصفر كمان
وعلى فكره الحب ده بييجى بعد ماالاتنين بيستريحو لبعض زى ماشوشو قالت
ولو الحب ده ماجاش قبل الجواز العلاقه دى بتكون فاشله لازم يتقربو من بعض ويتكون الحب فى فترة الخطوبه
وأنا الحمد لله كل الصفات اللى بدور عليها والحاجات اللى اتمنتها تكون فى شريك حياتى لقيتها الحمد لله مع خطيبى وبنحاول مع بعض أننا نخلى حياتنا أحلى..
معلش أنا أتكلمت كتير أوى بس بجد الموضوع كان شيق أوى للكلام وميرسى أوى ليك
|