طيب ليه مانتخذش إجراء صارم ويمنع الجشع اللي حاصل من التجار ده من ناحية إرتفاع الأسعار، يعني أنا بقترح إن أي واحد إتعرض لإرتفاع مقاجئ في الأسعار، يروح على أقرب مكتب تموين ويحكي له اللي حصل معاه بالضبط، ويوصف له مكان المحل اللي زود السعر فجأة من غير إحم ولا دستور، لإن الحكومة المصرية المبجلة مش حاطة مكاتب التموين "كمالة عدد" أو "سد خانة" لأ. الحكومة حاطة المكاتب دي لخدمة الجمهور والمواطنين ولو مكتب التموين ماعملش حاجة قيه اللي أعلى منه لحد مانوصل صوتنا لأعلى مستوى سواء كان وزير أو حتى رئيس الجمهورية، ومش عايزين يا جماعة نتعامل مع المشاكل اللي بتواجهنا بنوع من السلبية ونقف مكتوفي الأيدي ونعمل زي النعامة ونحط راسنا في التراب لحد مالمشكلة تعدي، عايزين نتعامل مع مشاكلنا بنوع من أنواع التحضر ومانقولش "يوه والله يا عبدوا انت مش عارف حاجة وبتقول كلام انشاء وخلاص، يعني لو رحنا لمكتب التموين تفتكر انهم هيحلوا حاجة، مش هايعملوا اي حاجة، دول موظفين غلابة والتجار جشعين والتاجر ممكن يسكت موظف التموين بكذا طريقة بداية من الارهاب لحد الرشوة" وانا في الحقيقة ارى ان موظف التموين ده ماهو الا اخويا واخوك وبيعاني برضه من نفس معاناتك من زيادة الاسعار، وممكن تقول لي طيب ماهو التاجر نفسه هو اخويا واخوك، هاقولك كلامك صح بس التاجر كان اخويا واخوك ولما داق طعم وهلاوة القرش مابقاش أخويا ولا اخوك اصبح انسان من كوكب تاني ماعندوش رحمة بالناس ولا الموظفين واصبح شغله الشاغل هو كيفية تجميع القرش.
تحيــــــــــــاتي