السلام عليكم ورحمه الله وبركاته..
ازيكوا كلكوا ؟
يارب تكونوا تمام
بصوا بقى المعلومه دى سمعتها وهى اكيد مهمه لينا كلنا.. لان محدش فينا مش بيسخن العيش..
طبعا كلنا بنسخن العيش خصوصاً ف الشتا بنسخنه على شعله النار.. بتاعه البوتاجاز
وف الحقيقه الطريقه دى مش صحيه خالص.. لان لهب احتراق غاز البوتان المستخدم ف الافران بيخرج معاه هيدروكربونات اروماتيه عديده الحلقات وبتكون ضاره جدا بالصحه..
وفيه كتير منها ليه تأثيرات مسرطنه للخلايا.. ويقوم العيش على طول بإمتصاصها..
كمان بيتلوث العيش بالسناج( soot ) اللى بتغطيه غالباً ذرات الفحم السوداء ..
وبعدين تدخل المركبات الكيميائيه دى للجاز الهضمى للانسان لما ياكل العيش الملوث ده.. والدم يمتصه..
وممكن بعضها يتجمع ف جزء او اكتر م الجسم ويسبب مشكلات صحيه نتيجه لتجمع كميات كبيره منها عن طريق استخدام الطريقه الغلط دى بشكل مستمر ف تسخين العيش..
وبدل كل ده ممكن نسخن العيش جوه فرن الغاز نفسه او ف الميكروويف..
اما افضل حاجه بقى واللى اكيد متوفره عند كل الناس هو انك تسخن العيش على طبق فيه ميه سخنه لدرجه الغليان.. وطبعا تكون ع النار عشان تكون بتطلع بخار يسخن العيش.. ف هيكون طرى زى الطازه بالظبط وف نفس الوقت مفيهوش الملوثات الكيميائيه دى اللى بتعلق ف العيش لما نسخنه على شعله الغاز..
يارب يكون الموضوع خفيف ويفيدكوا.. بجد مهم حاولوا تنفذوا الحكايه دى.. :thumbsup:
ارق تحياتى..