بسم الله الرحمن الرحيم

عمرك جربت

لعبه من دماغي يارب تعجبكو والالقي عليها مشاركات كتيرررررررررررر

فكرت اللعبه ان كل واحد يدخل يقول عمرك جربت (حاجه غريبه هوا جربها قبل كده)

مثلا : عمرك جربت تاكل برسيم؟؟

بس بشرط

الي يقول عمرك جربت يكون فعلا الحاجه دي ويحكيلنا ايه قصتها معاه


هابتدي بنفسي

عمرك جربت تاكل كبريت؟
بصراحه انا كلت كبريت

كنا في اسكندريه مع اصحابي
الجروب كله مافيهوش ولا واحد بيدخن
ولقيت واحد بيشتري كبريت اسمه محمد واحنا بنقوله عبد الكريم على اسم باباه
قلتله ياكيمو ايه الكبريت ده هاتعمل بيه ايه؟
قالي بالكه!!!!!!!!!!!!
قلتله يامقرف بتاكل الكبريت؟
قالي اه والله باكله

قلتله ده بتاكله ازاي ده؟
طلع عود
ومن راس الكبريته _عند الحته الحمره الي في الكبريت_ وراح قاطمها

انا فتحت بقي من التعجب

المهم كل شويه الاقيه فتح العلبه طلع عود واكل الكبريت
قلت والله العظيم لانا مجرب
هو يعني احسن مني ياكل كبريت وانا اقف اتفرج

رحت فاتح العلبه
طلعت عود
خدت قطمه

وبجد والله ياجماعه كنت هارجع
طعمه مقرررررررررررررررررررف

كنت عايز اولع فيه بالكبريت بتاعه الي بياكله وده مش ناقص بطنه كلها كبريت لو عملت جنبه نار قد كده هاولع في اسكندريه من المنتزه لمحطة الرمل

انت بقى عمرك جربت تاكل كبريت؟